Bordi i drejtorëve i Bankës Botërore miratoi strategjinë e re e për partneritet me Bullgarinë, njoftoi Agjencia Telegrafike Bullgare. Strategjia përfshin periudhën 2011-2013. Ajo parashikon një partneritet të ri dhe kompleks. Qëllimi është që Bullgaria të shfrytëzojë sa më shumë financim evropian. Banka do të ndihmojë me shërbime të konsultimit dhe analizës, të plotësuara me lëshim të huave për veprimtari që nuk u përgjigjen kërkesave për financim nga fondet evropiane ose nga institucionet evropiane.

“Për Bankën Botërore është një privilegj të vazhdojë partneritetin me Bullgarinë në rrugën e saj përpara në kuadër të BE-së – komentoi drejtori i Bankës për Evropën Qendrore dhe vendet baltike Peter Harold. – Bullgaria përjetoi një dekadë të rritjes ekonomike, por kriza financiare globale kishte një ndikim serioz në vend. Tani ekonomia bullgare është në proces rimëkëmbjeje, i cili zhvillohet mirë dhe përvijon perspektiva pozitive. Ne do të përdorim përvojën e Bullgarisë dhe do t’i aplikojmë konkluzionet në vende të tjera”, shtoi Peter Harold.

Partneriteti me Bankën Botërore u bazohet prioriteteve të përvijuara në një program kombëtar për zhvillim deri në vitin 2020, dhe ato janë pikërisht: përmirësimi i infrastrukturës, krijimi i një mjedisi më të mirë për biznesin dhe forcimi i mirëbesimit ndaj institucioneve shtetërore. Mbështetja e Bankës Botërore përfshin analiza dhe konsultime në fushën e infrastrukturës rrugore dhe ujore, përmirësim të mjedisit për biznes, forcim të administratës dhe financave publike, ndihmë për zhvillimin e gjelbër dhe për efektivitetin energjetik, mbështetje për zhvillimin e transportit hekurudhor, arsimit dhe përfshirjes sociale të grupeve më të prekshme, më tepër romët. Një nga fushat, ku do të drejtohet mbështetja financiare e Bankës Botërore sivjet është modernizimi i sektorit hekurudhor. Kjo do të bëhet nëpërmjet lëshimit të tri huave prej 80 milionë eurove secila. Me mbështetjen financiare të bankës me vëllim 70 milionë euro do të realizohet rehabilitimi i infrastrukturës hekurudhore. Mjetet do të përdoren për pajisje bashkëkohore dhe teknikë për mbajtje.

Ky është vetëm njëri prej shembujve për partneritetin e ardhëm të bankës Botërore me Bullgarinë. Ja dhe disa fakte për bashkëpunimin e deritanishëm. Vëllimi i përgjithshëm i mbështetjes financiare për vendin tonë gjatë të njëzet vjetëve të fundit është afro 4 miliardë dollarë amerikanë. Mbi 700 000 veta shfrytëzuan përmirësimin e mikro-infrastrukturës sociale dhe punësisë. Projekti për reformë të administratës bullgare të të ardhurave kontribuoi për mbledhjen më efektive të tatimeve dhe sigurimeve sociale me 4,6% të PBB-së nga viti 2002 deri në vitin 2008. Kjo është rritja më e madhe e të ardhurave ndër vendet anëtare të reja të BE-së. Koha për regjistrimin e një prone të patundshme dhe një hipoteke u pakësua nga shtatë në një ditë. Ka dhe shumë shembuj të tjerë. Ata janë një pjesë e praktikës së mirë të partneritetit midis Bankës Botërore dhe Bullgarisë, i cili do të zhvillohet në perspektivë.

Përgatiti në shqip: Ekaterina Tarpomanova