Në mbledhjen e Këshillit të BE-së në Bruksel, ministrat e jashtëm të vendeve anëtare nuk arritën një marrëveshje konkrete për paketën e 10-të të sanksioneve kundër Rusisë. Pas takimit u bë e qartë se nuk do të ketë embargo për importin e karburantit bërthamor. Sipas ministrit tonë të jashtëm Nikollaj Millkov, Bullgaria nuk do të dërgojë municione në Ukrainë, sepse nuk është marrë një angazhim i tillë. Ministri në detyrë i jashtëm saktësoi se "çështja e dhënies së ndihmës me tanke dhe mjete të blinduara luftarake është jashtëzakonisht delikate" dhe është diskutuar prej javësh. Deri më tani, asnjë vend nuk ka deklaruar me vendosmëri se do të japë. Mbështetja që Bullgaria i tregon Ukrainës është përmes misionit stërvitor të BE-së për ndihmën ushtarake në Ukrainë, i cili do të kryhet kryesisht në Gjermani dhe Poloni, theksoi Millkov dhe shtoi se vendi ynë po punon edhe për rehabilitimin e personelit ushtarak nga Ukraina.

• Ministri i Mbrojtjes: Nuk do të dërgojmë trupa në Ukrainë

Sipas ekspertëve të Institutit për Studimin e Luftës, trupat ukrainase kanë potencialin për të rifilluar iniciativën në front, por me mbështetje të mjaftueshme dhe në kohë nga Perëndimi. Sekretari amerikan i Shtetit Anthony Blinken tha se qeveria amerikane ishte e shqetësuar se Kina po shqyrtonte dërgimin e ndihmës vdekjeprurëse për Rusinë. Nga ana e saj, Kina u bëri thirrje "disa vendeve të ndalojnë menjëherë hedhjen e benzinës në zjarr" dhe u deklarua me vendosmëri kundër çdo forme hegjemonie dhe ndërhyrjeje të huaj në punët e brendshme të Kinës. Kina publikoi sot Iniciativën e Sigurisë Globale, me propozimet e Presidentit Xi Jinping për sigurinë, raporton BTA. Nisma bazohet në idenë se sistemet dhe qytetërimet e ndryshme shoqërore duhet të trajtohen në mënyrë të barabartë dhe sipas parimit të "sigurisë së pandashme" - një koncept që mbështetet edhe nga Rusia.