Presidenti Rumen Radev i paraqiti Legjislaturës së 51-të të Kuvendit Popullor një propozim për të mbajtur një referendum kombëtar me pyetjen "A jeni dakord që Bullgaria të vërë në qarkullim monedhën e vetme evropiane "euro" në vitin 2026?". Propozimi bazohet në Ligjin për Pjesëmarrjen e Drejtpërdrejtë të Qytetarëve në Pushtetin Shtetëror dhe Vetëqeverisjen Vendore, njoftojnë nga presidenca. Në arsyet e tij, presidenti thekson se marrëveshja për pranimin e vendit tonë në BE përfshin një angazhim, por nuk specifikohet asnjë afat i qartë për vënien e euros.

"Në shoqërinë bullgare nuk ka konsensus lidhur me gatishmërinë tonë për të vërë në qarkullim monedhën e vetme evropiane, as datën kur kjo do të ndodhë. Sondazhet sociologjike tregojnë qartë se shumica e qytetarëve bullgarë janë shumë të rezervuar ndaj ndërrimit të monedhës kombëtare në momentin e tanishëm", thekson Radev. Ai kujton se nëse raporti i jashtëzakonshëm i konvergjencës mbi gatishmërinë e vendit tonë për të hyrë në eurozonë, i pritur më 4 qershor, është pozitiv, Bullgaria do t'i bashkohet eurozonës më 1 janar 2026.

"Referendumi do të jetë një shërim për demokracinë bullgare. Do t'i japë popullit një zë dhe do të lejojë që të dëgjohen të gjitha argumentet. Do t'i japë klasës politike mundësinë për të rivendosur dialogun me votuesit dhe për të luftuar për besimin e tyre. Besimin që e humbi vitet e fundit", thekson kreu i shtetit në motivimin e tij.

• Kryeministri mendon se propozimi për një referendum për euron është jokushtetues

Redaktoi: Miglena Ivanova

Përgatiti në shqip dhe publikoi: Svetllana Dimitrova