Bullgaria dhe Rusia mbeten investitorë kryesorë në projektin e Centralit atomik “Belene”

botuar më 10-12-01 12.11.MD

Gjatë kohës së forumit ndërkombëtar energjetik “Energjetika pa kufij – nga qëndrimi kombëtar tek ai regjional” u nënshkrua memorandumi për krijimin e Centralin Atomik Elektrik “Belene”.

Foto: Tanja Harizanova

Sofja dhe Moska i dhanë dritë jeshile kompanisë së projektimit prej investitorëve për ndërtimin e Centralit atomik “Belene”. Kjo u bë pas takimit midis kryeministrit Bojko Borisov dhe drejtorit të përgjithshëm të kompanisë shtetërore ruse “Rosatom” Sergej Kirienko gjatë kohës së Konferencës ndërkombëtare energjetike për Evropën Juglindore “Energjetika pa kufij – nga qëndrimi kombëtar tek ai regjional”. Në bazë të memorandumit të nënshkruar, Bullgaria do të ketë 51 %, ndërsa Rusia - 47 %. Investitorët që shfaqin interes ndaj projektit dhe të cilët u shpallën në kohën e forumit – operatori bërthamor finlandez “Fortum Corporation” dhe kompania franceze e inxhinieringut “Altran Technologie” – marrin nga 1 për qind, dhe pjesa e tyre mund të rritet deri në 25 %, në varësi prej dëshirës së tyre. Nëse do të mbeten pjesa të lira, ato do të bëhen pronë të “Rosatom”-it. Pritet që ndaj projektit të bashkohet edhe Serbia, e cila konfirmoi interesin e vet ndaj projektit me pjesëmarrje deri në 5 %. Për nënshkrimin e memorandumit pritet që gjatë kësaj jave në Sofje të mbërrijë dhe kryeministri serb Mirko Cvetanoviç. Me gjithë mosmarrëveshjet e gjata rreth çmimit të projektit në memorandum është fiksuar çmimi prej 6,3 mlrd eurosh. Bullgaria do të kërkojë mundësi suplementare për financimin e Centralit atomik “Belene”, ndërsa kompania e projektimit – investitorë të rinj evropianë. Bullgaria do të ruajë minimum 20 % prej kompanisë, nëse nuk gjenden investitorë të tjerë. Sofja do të mbulojë financimin e 51 % të projektit me anën e kredive. Brenda 4 muajve kompania e projektimit do të formohet përfundimisht, ndërsa pas 6 muajve do të ketë marrëveshje midis vendeve me angazhimet konkrete.

“Bullgaria do të mbetet lider në energjetikën bërthamore edhe në të ardhmen” – komentoi drejtori i përgjithshëm i projektimit “Rosatom” Sergej Kirienko. “Gjatë dhjetorit të vitit tjetër do të bëhet gati kompleti i parë i pajisjeve për Centralin atomik “Belene” - nënvizoi drejtori i kompanisë shtetërore ruse. Kjo do të lejojë që të ofrojmë reaktorin në afate të shkurtra. Gjatë vitit 2016 do të dorëzohet blloku i parë, në 2017 – blloku i dytë. Kjo do t’i lejojë Bullgarisë të ruajë pozitat e veta të liderit. Sepse sot disa vende në rajon kanë deklaruar në programet e tyre ndërtimin e kapaciteteve të reja bërthamore. Ai që do të jetë i pari, do të fitojë. Ky është një investim madhështor për ekonominë bullgare në masë prej më se 6 mlrd eurosh.”

Në kohën e Konferencës ndërkombëtare energjetike për Evropën Juglindore kryeministri Bojko Borisov nënvizoi, se KE nuk i jep mbështetjen e nevojshme gazsjellësit “Nabuko” dhe këmbënguli për sigurimin financiar të vendeve që marrin pjesë në projekt.

“Ne gjithmonë e kemi konsideruar “Nabuko” si projekt prioritar për Bullgarinë, theksoi pozitën e vendit kryeministri Borisov para pjesëmarrësve të forumit, duke kritikuar KE. Unë, personalisht, kam disa vërejtje ndaj ritmeve, me të cilat punohet për kthimin e tij në projekt prioritar edhe për BE. Garancitë bankare për projektin “Nabuko” në masë prej 2 mlrd eurosh të mos merren parasysh gjatë llogaritjes së deficitit buxhetor. Shpresoj, se BE do të pranojë propozimin tim.”

Midis Bullgarisë dhe Greqisë u nënshkrua një marrëveshje për krijimin e një kompanie të përbashkët për ndërtimin e lidhjes ndërmjet sistemeve energjetike të të dy vendeve. Në kohën e forumit u nënshkrua dhe karta e rrugës për ndërtimin e lidhjes së gazit midis Bullgarisë dhe Rumanisë Projekti do të përshpejtohet që të mos humbet financimi falas nga BE në masë prej 9 mln eurosh.

“Nënshkruam me kolegun rumun marrëveshjen për integrimin e tregjeve energjetike të Bullgarisë dhe Rumanisë - shtoi ministri Trajkov. Bullgaria dhe Rumania si anëtare të BE u nënshtrohen rregullave të njëjta në fushën e energjetikës, por kemi projekte dhe ide të përbashkëta si mund të gjejmë fitimin më të mirë edhe për të dy vendet.”

Përgatiti në shqip: Sofia Popova

По публикацията работи: Tanja Harizanova

Последвайте ни и в Google News Showcase, за да научите най-важното от деня!

Ndaje

Bullgaria dhe Rusia mbeten investitorë kryesorë në projektin e Centralit atomik “Belene”

Më shumë nga rubrika

Inflacioni në Bullgari përshpejtohet në 3.8% në janar

Konkurrueshmëria e ekonomisë evropiane është një temë kyçe në PE sipas eurodeputetëve bullgarë

4% e PBB-së është nga sektori i bujqësisë