Mbi 50 mijë vepra në Shtëpinë e humorit dhe satirës në Gabrovo

botuar më 10-12-22 11.33.PD

Foto: bulgariainside.com

-Pse në dasmë njerëzit nga Gabrovoja vallëzojnë me çorapë?
-Sepse dëgjojnë muzikën nga fshati fqinj.

Kjo është një nga anekdotat e shumta për banorët e qytetit Gabrovo të Bullgarisë Veriore dhe për koprracinë e tyre të dëgjuar. Dihet gjithashtu se ata me kënaqësi tallen me vete, kurse kjo është shenjë inteligjence. Gjatë vitit 1972 mbi themelet e një fabrike për përpunim të lëkurës në Gabrovo u ndërtua Shtëpia e humorit dhe satirës. Kurse gjatë vitit tjetër në të filloi të organizohej një Bienale ndërkombëtare. Nga ajo dhe nga burime të tjera Shtëpia e humorit dhe satirës mblodhi një koleksion prej 50 mijë veprave të artit humorist dhe satirik – karikatura, fotografi, piktura, grafika, pllakate, skulptura.

“Kjo na bën të pasur dhe na jep mundësi të ndërrojmë ekspozitat tona, duke bërë ekspozita tematike nga fondi, sepse për ne ai nuk është një depo veprash – rrëfen në një intervistë për Radio Bullgarinë Tatjana Cankova, drejtore e Shtëpisë së humorit dhe satirës. – Shumica e veprave janë dhuruar dhe ne u kemi premtuar dhuruesve se veprat do të tregohen. Kemi disa ekspozita të përhershme. Ato shpjegojnë pse Shtëpia e humorit dhe satirës është dukur pikërisht në Gabrovo. Njëra nga ekspozitat është “Rrënjët e humorit të Gabrovos”. Tjetra është e vetmja ekspozitë me kopje, sepse në parim ne mbledhim vetëm origjinale. Kopjet janë të pikturave satirike në kishat bullgare. Dëshirojmë të tregojmë se madje gjatë Mesjetës dhe Rilindjes bullgari ka menduar në mënyrë satirike. Këtë ekspozitë e kanë vizituar shumë priftërinj. Një ekspozitë tjetër e përhershme është me maska dhe kostume afrikane. “Ajo pse është këtu”, na pyeti një herë një gazetar amerikan. Sepse në të shohim të njëjtat zakone për pjellorinë, të cilat ekzistojnë dhe në Bullgari. Kemi dhe një ekspozitë “Karnavalet nëpër botë”. Ekspozita tjetër titullohet “Planeti i Gabrovos” dhe është një atraksion për fëmijë nga 5 deri në 105 vjeç. Në të vërtetë ka një planet që quhet Gabrovo. Ai u zbulua më 1 prill të vitit 1985, në Ditën ndërkombëtare të humorit dhe shakasë. Mban emrin e qytetit tonë, sepse astronomi ukrainas, i cili e zbuloi, dinte për Gabrovon dhe asociacioni i tij me 1 prillin ishte pikërisht me qytetin tonë. Në ekspozitë përpiqemi të tregojmë si do të dukej planeti i qeshjes Gabrovo.”

Shtëpia e humorit dhe satirës nuk është thjesht një muze me fonde të pasura. Ajo organizon dhe shumë aktivitete dhe festa, të cilat tërheqin jo vetëm banorët vendës, por edhe turistët. Për fëmijët organizohen konkurse të ndryshme, për shembull “Gabrovoja – qyteti, të cilin e duam” me rast të përvjetorit të 150-të të shpalljes së Gabrovos për qytet. Tani me partnerë nga qyteti Nikelino i Italisë përgatitet një konkurs me temë “Ëndrra ime për humor”. Çdo vend organizon etapën e tij të garës, pastaj një ekspozitë e përbashkët e fëmijëve bullgarë dhe italian do të hapet më 1 prill të vitit 2011 në Nikelino, pastaj më 6 tetor do të prezantohet në Gabrovo. Gjatë vitit 2011, në partneritet me parkun kombëtar Ballkani Qendror planifikohet një shfaqje në mbrojtje të pyllit me një koleksion karikaturash në këtë temë. Më 21 maj do të hapet edicioni i 20-të i Bienales ndërkombëtare të humorit dhe satirës.

“Bashkëorganizatorë janë Bashkia e Gabrovos dhe Ministria e Kulturës, të cilat japin çmime. Kemi dhe shumë firma, të cilat e mbështetin këtë art dhe japin çmime – tregon Tatjana Cankova. – Zakonisht nuk bëjmë një ekspozitë m vete, prezantojmë dhe arte të tjera. Prandaj bëjmë ndonjë koncert të vogël ose një surprizë poetike. Ose ftojmë shkrimtarë që krijojnë vepra humoriste. Në këtë sintezë të arteve krijohen festa për publikun.”

Rreth festave të Krishtlindjeve dhe Vitit të Ri Shtëpia e humorit dhe satirës është mikpritëse e disa ekspozitave interesante. Ndër to është “Krishtlindja çeke”, e cila rrëfen për traditat festive në Çeki. Ajo u hap më 13 dhjetor. Më 16 dhjetor u hap ekspozita e karikaturistit të njohur bullgar Ilijan Savkov. Tema e ekspozitës së tij është shumë interesante – “Pasdrekja e një VIP”. Dhe një hollësi tjetër interesante – Ilijan Savkovi është përfshirë në Librin e rekordeve Gines si piktori, i cili vizaton sharzhe më shpejt.

Përgatiti në shqip: Ekaterina Tarpomanova

По публикацията работи: Veneta Pavllova

Последвайте ни и в Google News Showcase, за да научите най-важното от деня!

Ndaje

Mbi 50 mijë vepra në Shtëpinë e humorit dhe satirës në Gabrovo

Më shumë nga rubrika

Radosllava Nedjalkova nga "Nashenci": Ansamblet folklorike janë zemrat e komuniteteve bullgare në mbarë botën

Bullgaria dhe Kosova do të bashkëpunojnë në kinematografi

Ekspozita “Artizanët e Sofjes” zbulon vende të papara në kryeqytet