Bullgaria u përgjigjet kërkesave evropiane për sigurim të ushqimeve

botuar më 11-07-28 11.00.PD

Katrin Lanel nënvizoi bashkëpunimin e mirë të EFSA-s me Agjencinë bullgare për sigurim të ushqimeve.

Foto: BGNES

Për vizitë të parë në Bullgari ishte zonja Katrin Geslen-Lanel, drejtoreshë e Agjencisë evropiane për sigurim të ushqimeve (EFSA), të krijuar në vitin 2002. Roli i EFSA-s është që nëpërmjet përpunimeve shkencore të vlerësojë rreziqet e tërë vargut ushqimor – nga prodhimi i ushqimeve e gjer te përdorimi i tyre nga konsumatorët. Praktika e këtij organi evropian përdoret si bazë e përpunimit të legjislacionit evropian, të lidhur me sigurimin e ushqimeve dhe shëndetin e evropianëve. Ky sigurim ka të bëjë me shëndetin e kafshëve dhe me qëndrimin human ndaj tyre, si dhe me përballimin e riskut në bujqësi. Sfidat nuk janë pak, nënvizoi zonja Katrin Geslen-Lanel. Ajo rikujtoi situatën e rrezikshme në lidhje me epideminë ushqimore, të shkaktuar nga E.coli në Gjermani këtë vit, gjë që shkaktoi komunikimin e përditshëm midis EFSA dhe Qendrës për vlerësimin e riskut pranë Agjencisë bullgare për sigurim të ushqimeve.

“Edhe ne si Qendra bullgare për vlerësimin e riskut, jemi të përgjegjshëm për gjithçka, duke filluar nga prodhimi në fushë e gjer te pjata e konsumatorit – saktëson Katrin Lanel. – Ne kemi përgjegjësi për çështje më të ndryshme, si ato të lidhura me shëndetin e bimëve, domethënë çështjet fitosanitare, me organizmat e modifikuara gjenetikisht, me pesticidet dhe ndotësit e tjerë në bimë. Jemi të përgjegjshëm edhe për çështjet e lidhura me punën e veterinarëve dhe me qëndrimin human ndaj kafshëve. Pastaj përgjegjësia jonë është lidhur me industrinë përpunuese me të gjitha enzimat dhe shtesat ushqimore, si dhe me të gjitha lëndët e tjera, që të arrihet më në fund deri në pjatën e konsumatorit.”

Katrin Lanel nënvizoi shprehimisht bashkëpunimin e mirë të EFSA-s me Agjencinë bullgare për sigurim të ushqimeve. “Ne bashkëpunojmë me palën bullgare çdo ditë – thotë ajo. – Për shembull sa i përket epidemisë së shkaktuar nga E.coli në Gjermani, grumbulloheshin të dhëna edhe nga Bullgaria. Po punojmë dhe mbi një çështje tjetër të rëndësishme – sëmundja shap ndër kafshët, bashkë me Turqinë, Greqinë dhe Bullgarinë. Bullgaria është një vend kyç në mbrojtjen e kufirit të BE-së, prandaj ndihma ndaj vendit tuaj është me një rëndësi madhe.”

Problemi në lidhje me shapin e kafshëve në Turqinë fqinje dhe përballimin e përhapjes së sëmundjes në territorin bullgar imponon krijimin e një rrethi, i cili të kufizojë lëvizjen e lirë të kafshëve, deklaroi ministri i bujqësisë Mirosllav Najdenov. Për këtë qëllim qeveria bullgare ka livruar 7 milionë leva (rreth 3,5 milionë euro). Në këtë lidhje Katrin Lanel shtoi: “Bullgaria na ndihmoi edhe sa i përket kësaj çështjeje dhe Komisioni Evropian na dha një mandat që të studiojmë situatën rreth përhapjes së shapit në këtë rajon. Sa i përket Bullgarisë ne jemi të sigurt se kemi një partner stabil në këtë punë.”

Sipas drejtorit të Agjencisë për sigurimin e ushqimeve doktor Jordan Vojnov, në plan evropian duhet të unifikohen edhe kriteret sa i përket vlerësimit të rrezikut dhe administrimit të tij. Për këtë qëllim EFSA po përgatit ekspertë nga vendet anëtare.

Përgatiti në shqip: Vesella Mançeva

По публикацията работи: Millka Dimitrova

Последвайте ни и в Google News Showcase, за да научите най-важното от деня!

Ndaje

Bullgaria u përgjigjet kërkesave evropiane për sigurim të ushqimeve

Më shumë nga rubrika

Dimri i breshkave - ekipi i Qendrës së Shpëtimit pranë fshatit Banja kujdeset për mbi 200 banorë të saj

Vesella Rajçinova: Bullgarët gëzojnë një reputacion shumë të mirë në Izrael

Qytetet bullgare nisin garën për Kryeqytetin Evropian të Kulturës 2032

Vesella Rajçinova: Bullgarët gëzojnë një reputacion shumë të mirë në Izrael

Dimri i breshkave - ekipi i Qendrës së Shpëtimit pranë fshatit Banja kujdeset për mbi 200 banorë të saj