Bullgaria ndaloi peshkimin e llojeve të blirit në lumin Danub

botuar më 12-02-08 10.47.PD

Foto: evropea.com

Më 20 janar 2012 Bullgaria më në fund imponoi një ndalim 4 vjeçar të peshkimit të llojeve të blirit në rrjedhën e poshtme të lumit Danub. Në këtë mënyrë ajo bashkohet me ndalimin 10 vjeçar të peshkimit të imponuar nga Rumania që gjatë prillit të vitit 2006 në anën tjetër të lumit.

Siç mund të supozoni, ky ndalim i deritanishëm nga ana e Rumanisë në pjesën e përbashkët të lumit të madh nuk ishte shumë efektiv. Në vitin 2008 Bullgaria ndaloi peshkimin e llojeve të blirit në Detin e Zi dhe që në vitin 2011 imponoi një ndalim njëvjeçar të peshkimit të tyre në Danub. “Më në fund Bullgaria mori një vendim afatgjatë sa i përket këtij problemi” – komentoi para Radio Bullgarisë Stojan Mihov nga dega bullgare e Fondit botëror për natyrën e egër (WWF).

Pse është i domosdoshëm ky ndalim?

Sepse këta peshq të mëdhenj dhe të rrallë, të cilët ndoshta kanë ekzistuar që para dinozaurëve, janë duke u zhdukur. Gjatë shekullit të kaluar ata asgjësoheshin nga njeriu për shkak të havjarit të tyre të vlershëm. Një kilogram prej havjarit të këtyre peshqve arrinte disa mijë euro. Kështu në fund të shekullit numri i tyre u ul në mënyrë drastike. Kjo e detyroi Konventën për tregti ndërkombëtare të llojeve të kërcënuara nga fauna dhe flora e egër (CITES) të shpallë kuota për tregtinë me havjarin e zi ndër vendet e regjionit të Danubit, kurse në vitin 2007 ajo ndaloi përfundimisht tregtinë me këtë delikates.

Le të rikujtojmë se pas Detit Kaspik, Deti i Zi është pellgu i dytë për nga rëndësia, ku është përqendruar popullata kryesore e blirëve, kurse Danubi është një prej degëve më të mëdha të Detit të Zi, ku që prej shekujsh këta peshq shkojnë për të hedhur havjarin e vet. Deri në shekullin XIX blirët kanë migruar pa problem nga Deti i Zi përmes Danubit deri në Gjermani. Mirëpo më vonë digat dhe pajisjet në lum, si hidronyja “Dera e hekurt” midis Serbisë dhe Rumanisë, ndërprenë rrugët e migracionit të blirëve dhe në fakt e ndërprenë rrugën e tyre deri në vendet e dikurshme të riprodhimit.

© Foto: WWF
Danubi është lumi i vetëm në territorin e BE-së, ku ende llojet e blirit mund të riprodhohen dhe të mbijetojnë – nënvizoi Stojan Mihov nga WWF. – Lumenjtë e tjerë të mëdhenj janë në një gjendje më të keqe për shkak të ujërave të tyre të ndotura ose për shkak të pajisjeve hidroteknike, të cilat nuk lejojnë lëvizjen e lirë të peshqve. Tani për tani vetëm në pjesën bullgaro-rumune të Danubit afër “Derës së Hekurt” blirët mund të lundrojnë dhe të hedhin havjarin e vet.

Rrjedha e poshtme e Danubit me të vërtetë është një prej strehimeve të fundit të blirëve, të cilët kanë mbijetuar 200 milionë vjet. Dikur në Danub kanë jetuar gjashtë lloje bliri. Tani për tani në lumin Danub ka katër lloje bliri, ku vijnë nga Deti i Zi – thotë eksperti. – Më i madh është interesi ndaj blirit turishkurtër. Ky është bliri më i madh dhe përkatësisht hedh më shumë havjar, i cili shitet shumë shtrenjtë në tregjet në BE dhe SHBA. Mirëpo gjendja e popullatave të këtyre katër llojeve të blirit është më se kritike. Një prej veçorive të këtij lloji biologjik është se pjekuria seksuale ndodh shumë vonë – nga viti i nëntë deri në vitin e pesëmbëdhjetë të jetës së peshqve. Për këtë shkak rimëkëmbja e popullatës së tyre është shumë e ngadaltë.

Sipas ekologëve nga WWF ndalimi i imponuar i peshkimit të llojeve të blirit në rrjedhën e poshtme të lumit Danub deri në vitin 2016 është një hap i domosdoshëm, por i vonuar dhe i pamjaftueshëm. Ka nevojë për një mbikëqyrje të pandërprerë të popullatave dhe për shumimin masiv të peshkut në lum. Përveç kësaj duhet të zhvillohen fushata informative ndër komunitetin e peshkatarëve për aplikimin real të ndalimit të peshkimit, sepse peshkimi pa leje nuk ka ndaluar.

Përgatiti në shqip: Vesella Mançeva

По публикацията работи: Maria Dimitrova

Последвайте ни и в Google News Showcase, за да научите най-важното от деня!

Ndaje

Bullgaria ndaloi peshkimin e llojeve të blirit në lumin Danub

Më shumë nga rubrika

Bullgaria është e para në BE që realizoi inteligjencën artificiale të nivelit të lartë në gjuhën e saj

Ekipi i ri i Ursula von der Leyen: a do të arrihet një "marrëveshje paketë" për të miratuar të gjithë komisionerët e BE-së

Rajonet ku jetojnë bullgarë në Shqipëri është e nevojshme të kenë autonomi administrative

Chat-i bullgar me inteligjencën artificiale BgGPT mund të shfrytëzohet falas nga të gjithë

Nuk ka qartësi se cila pjesë e trashëgimisë kulturore bullgare në Ukrainë është ruajtur për brezat e rinj