Kohët e fundit fansat e xhazit në Bullgari kënaqen me muzikën e grupit “Metamorfoza”. Në krye të tij qëndron trombisti Rosen Zahariev-Roko. Ai merret me muzikë që nga koha e fëmijërisë. Shtatë vjet me radhë i vogli Rosen ka kënduar në Korin e Fëmijëve të Radios Kombëtare Bullgare. Fillimisht është interesuar për perkusionet dhe pas kësaj ka filluar t’i binte pianos. Në moshën e adoleshencës është pasionuar pas trombës. Ndikim të madh mbi zhvillimin e muzikantit të ri kishte pedagogu i tij Anton Hristov nga Shkolla e Muzikës në Sofje. Megjithëqë Rosen ka mbaruar arsimin e mesëm në instrumentet klasike, ai i është kushtuar muzikës xhaz. Më se 20 vjet muzikanti eksperimenton në këtë stil.

Grupi “Metamorfoza” është formuar më 2012. Në të interpretojnë Rosen Zahariev-Roko, Antoni Rikev (bas), Nikollaj Danev (bateri) dhe Mirosllav Ivanov (kitarë).

Rosen Zahariev-Roko merret dhe me veprimtari të tjera përveç muzikës. Gjatë vjeshtës do të kombinojë teatrin me kërcimet. Ka ndërmend të bëjë projekte po ashtu edhe në kinematografi.

Përgatiti në shqip: Anna Kapitanova