Gjatë kësaj jave Bullgaria shënon 25 vjet nga rrëzimi i regjimit komunist në vend. Një çerek shekulli pas datës historike, 10 nëntor, në sheshin “Zhurnalist” /“Gazetari”/ në Sofje u inaugurua monumenti i shkrimtarit dhe emigrantit politik Georgi Markov, i cili u vra në Londër në vitin 1978. Inaugurimi i monumentit është në kuadrin e fushatës “25 vjet Bullgaria e lirë”. Në ceremoninë zyrtare ishin të pranishëm tre presidentë bullgarë – Zheljo Zhelev, Petër Stojanov dhe Presidenti i tanishëm Rosen Plevneliev. “Për mua është një nder i madh të jem i pranishëm në inaugurimin, edhe pse pak të vonuar, të këtij monumenti – në këtë mënyrë ne tregojmë respektin tonë ndaj veprës së një prej shkrimtarëve më të talentuar bullgarë, të cilët kanë punuar gjatë diktaturës komuniste. Me zërin e tij të fuqishëm Georgi Markov është një prej shembujve më të mëdhenj të zgjedhjes midis lirisë dhe nënshtrimit” – deklaroi para njerëzve të grumbulluar Presidenti Rosen Plevneliev. Në ceremoninë në Sofje ishin të pranishëm e shoqja e shkrimtarit Anabell Markova, e cila mbërriti posaçërisht me këtë rast nga Londra, dhe vëllai i tij Nikolla Markov, i cili që prej vitesh banon në Itali.

“Të gjallët i mbyllin sytë e të vdekurve. Të vdekurit i hapin sytë e të gjallëve” – këto fjalë të urta të lashta, të cilat Georgi Markov i përmend në veprën e tij “Reportazhet e largëta”, lexohen në faqen e majtë të monumentit, vepër e skulptorit Denko Denkov. Mjetet për monumentin janë dhuruar nga kirurgu me famë botërore d-r Georgi Llazarov, i cili emigroi nga Bullgaria në vitin 1969. D-r Llazarov deklaroi para njerëzve të grumbulluar se veprat e Georgi Markovit duhet të jenë në manualet e letërsisë, krahas veprave të Hristo Botevit. 

Përgatiti në shqip: Vesella Mançeva