Dje në kuadrin e “Mbrëmjeve të Ballkanistikës” në Universitetin e Sofjes u mbajt prezantimi i librit “Nacionalizmi shqiptar” të Milazim Krasniqit. Përkthimi i veprës në bullgarisht është realizuar nga dr. Anton Pançev dhe studentët e degës së Ballkanistikës Borisllava Ivanova dhe Simeon Mihallkov me ndihmën e Shoqatës “Instituti Shkencor Ballkanas”. Në prezantimin e librit ishin të pranishëm ish ambasadori i Bullgarisë në Republikën e Kosovës z. Bobi Bobev, si edhe tërë stafi diplomatik i Ambasadës së Kosovës në Sofje. Sh. e Tij Ambasadori Shpend Kallaba theksoi rëndësinë e përkthimit të librave si një kusht për thellimin e bashkëpunimit dhe përforcimin e paqes në Ballkan.

Posaçërisht për Radio Bullgarinë profesor Krasniqi komentoi tema aktuale si rritja e nacionalizmit në botën globale, format e nacionalizmit të sotëm shqiptar, e ardhmja e Ballkanit, retorika kuazinacionaliste politike, gjendja e mediave etj.