Një muaj pas zgjedhjeve parlamentare para afatit mund të thuhet se formimi i qeverisë së re të koalicionit të Bullgarisë është çështje ditësh. Pasi dje GERB dhe koalicioni Patriotët e Bashkuar nënshkruan marrëveshjen e tyre të koalicionit, kandidati i partisë fituese në zgjedhje Bojko Borisov tashmë ka mandat për formimin e kabinetit të tretë të radhës dhe duhet të paraqitet përbërja e tij në kuadrin e një jave.  

Emrat e ministrave ende nuk dihen, por struktura e qeverisë së ardhshme dhe rregullat për marrjen e vendimeve janë saktësuar qartë në marrëveshjen e koalicionit. Kabineti “Borisov 3” do të ketë 4 zëvendëskryeministra dhe 17 ministra, kurse në dallim të herëve të tjera shpërndarja e posteve mes partnerëve të koalicionit nuk do të realizohet në përputhje me kuotat e fiksuara paraprakisht. Anëtarët e qeverisë do të mund të jenë persona, të cilët nuk u përkasin formacioneve në pushtet. Një veçori e rëndësishme e koalicionit të ri është se vendimet kryesore politike të qeverisë së tij do të merren me konsensus nga këshilli i koalicionit, i cili përbëhet prej tre përfaqësuesish të GERB-it dhe Patriotëve të Bashkuar. Një këshill i tillë, por me famë jo të mirë, ekzistonte në koalicionin e dikurshëm të trefishtë të Partisë Socialiste Bullgare, Lëvizjes për të Drejtat dhe Liritë dhe Lëvizjes Kombëtare Simeoni i Dytë, ku vendimet merreshin nga liderët e këtyre tri formacioneve. Tani, në këtë etapë, nuk ka kritika ndaj marrjes së vendimeve në koalicionin e ardhshëm, ndoshta sepse me kërkesën për konsensus eliminohet risku nga diktati i partnerit të madh të koalicionit GERB.

Është parashikuar gjithashtu masë për prevencë të diktatit në nivelin e ministrive, nëpërmjet aplikimit të një norme, sipas së cilës një prej zëvendësve të ministrit duhet të shënohet nga partneri tjetër i koalicionit.

Kabineti i koalicionit ka sigurime të drejtpërdrejta se për disa çështje të veçanta do të mund të shpresojë te përkrahja e Lëvizjes për Drejtat dhe Liritë de të partisë “Volja” (“Vullnet”) të afaristit Mareshki. Te një mazhorancë e tillë “lundruese” në Parlament, Kryeministri Borisov shpresonte edhe gjatë mandatit të tij të kaluar, kështu qe ai ka përvojë në këtë drejtim.

Oponenti i vetëm kategorik i koalicionit do të jetë koalicioni i majtë “Partia Socialiste Bullgare për Bullgarinë”, por edhe ajo dha sinjale të qarta se do të përmbahet nga veprimet radikale kundër qeverisjes derisa nuk përfundon kryesia bullgare e BE-së, ose deri në mes të vitit tjetër. Në këto rrethana e ardhmja e afërt e qeverisë së re të koalicionit të vendit tonë duket pa probleme. Shpallja e përbërjes së kabinetit pritet më 3 maj.

Përgatiti në shqip: Vesella Mançeva