Austria bëri thirrje për aderimin e shpejtë të vendeve nga Ballkani Perëndimor në Bashkimin Evropian

Ministri austriak i Punëve të Jashtme Sebastian Kurc bëri thirrje për aderimin e shpejtë të vendeve nga Ballkani Perëndimor në BE. Në një intervistë për të përditshmen gjermane “Handelsblatt” Kurc nënvizoi se vetëm integrimi evropian mund ta ndalojë ndikimin e forcuar të Turqisë dhe të Arabisë Saudite në këtë regjion. Sipas fjalëve të tij, sfidat si Brexit, kriza e migrantëve dhe terrorizmi islamik nuk duhet ta shtyjnë Ballkanin Perëndimor nga fokusi i Brukselit. “Bëhet fjalë për një regjion me shtete të reja, të cilat kanë probleme të ndryshme etnike mes tyre. BE-ja duhet t’i ndihmojë në luftimin e tyre kundër radikalizimit”, ngul këmbë Ministri austriak i Punëve të Jashtme. Integrimi evropian i Ballkanit Perëndimor u shpall nga Bullgaria si prioritet i kryesisë së saj të Këshillit Evropian në gjysmën e parë të vitit 2018.

Serbia dhe Maqedonia u morën vesh dhe do t’i ruajnë marrëdhëniet e tyre miqësore

Presidenti i Serbisë Aleksandër Vuçiç dhe Kryeministri i Maqedonisë Zoran Zaev shqyrtuan rrethanat e reja në marrëdhëniet dypalëshe, bëri të ditur gazeta serbe BLIC. Megjithë dallimet politike, ata të dy kanë arritur konsensus për ruajtjen dhe zhvillimin e marrëdhënieve miqësore. Para disa ditësh Beogradi tërhoqi për konsultime të ngutshme personelin e Ambasadës në Shkup me motivin – veprimtari spiune kundër institucioneve serbe. Pala maqedonase e refuzoi kategorikisht akuzën. Mediat maqedonase vunë në dukje se reaksioni i Beogradit është provokuar nga qëllimet e kabinetit të Zaevit për ta përkrahur aderimin e Kosovës në Unesko.

Erdogan shprehu shqetësimin e vet për shkak të furnizimeve të armës amerikane për luftëtarët kurdë sirianë

Presidenti turk Rexhep Tajip Erdogan shprehu para Ministrit të Mbrojtjes të SHBA-së Xhejms Matis shqetësimin e Turqisë për shkak të furnizimeve të armës amerikane për Forcat Kurde Siriane për mbrojtjen e popullit në kuadrin e luftës kundër “Shtetit Islamik”. Në një deklaratë të përhapur pas takimeve mes Matisit dhe përfaqësuesve turq, thuhet se të dyja palat kanë theksuar rëndësinë e ruajtjes së tërësisë territoriale të Sirisë dhe të Irakut. Ankaraja dhe Uashingtoni bënë të ditur se janë kundër zhvillimit të referendumit për pavarësinë e Kurdistanit Irakian, i cili duhet të mbahet më 25 shtator.

Refugjatët në Greqi bëhen fermerë

Fluksi i migrantëve drejt ishujve grekë po vazhdon. Çdo ditë zhvillohen nja disa operacione shpëtimtare nga autoritetet kufitare greke dhe nga forcat e agjencisë evropiane Fronteks. Ata që mbërrijnë mbeten në ishuj deri në shqyrtimin e kërkesës së tyre për strehim, por procedura vazhdon pothuaj një vit. Kampet e vendosjes nuk i përgjigjen numrit të të vendosurve. Në ishullin Samos kampi është për 700 veta, kurse atje banojnë mbi 2 mijë. Migrantët, të cilët marrin refuzim për strehim, fshihen nga autoritetet, që të mos kthehen në Turqi. Ata përpiqen të largohen nga Greqia me dokumente të falsifikuara, duke u paguar trafikantëve 2000 euro. Që të tërheqin një pjesë të refugjatëve me lejë për qëndrim, autoritetet greke u propozojnë atyre falas troje bujqësore. Firmat private, të cilët emërojnë refugjatë, gjithashtu marrin lehtësime tatimore, bëri të ditur korrespondentja e Radios Kombëtare Bullgare në Greqi Katja Peeva.

Roja rumune e brigjeve ka ndaluar një anije me 70 migrantë në Detin e Zi

Roja rumune e brigjeve ka ndaluar një anije me 70 migrantë me origjinë siriane dhe irakiane, ndër të cilët 23 fëmijë, në Detin e Zi afër portit Mangalia. Në fund të javës së kaluar roja rumune e brigjeve kapi një jaht me flamur turk, me 69 migrantë ilegalë nga Iraku përsëri në rajonin e portit Mangalia në Detin e Zi. Mediat rumune supozuan se Deti i Zi bëhet një itinerar alternativ i trafikantëve të refugjatëve drejt Evropës.

Përpiloi: Miglena Ivanova
Përgatiti në shqip: Vesella Mançeva