Ish-spitali qeveritar “Llozenec” është përfshirë në një skemë kriminale për transplantime organesh për shtetas të huaj, ndërsa rregullat për transplantime në vendin tonë janë shkelur rëndë, pasi disa njerëz kanë dalë përpara nevojtarëve të tjerë me urdhër "nga lart". Këto zbulime tronditëse u bënë disa ditë më parë nga Ministri i Shëndetësisë Dr. Stojço Kacarov. Për shkak të zvogëlimit të numrit të situatave të transplantimit në vend dhe rritjes së numrit të qytetarëve bullgarë që kanë nevojë për transplantim, tema rezonoi fort në hapësirën e mediave vendase.

"Bullgaria që prej vitesh është një rrugë për trafikimin e dhuruesve të gjallë," deklaroi para BNR-së Asja Paskaleva nga Qendrës Bullgare për Bioetikën, duke komentuar se ajo nuk është e befasuar se ky lloj aktiviteti i paligjshëm po vazhdon.

"Transferimi i organeve realizohet nga vendet e varfra drejt atyre të pasura dhe ne e shohim këtë edhe në këtë skemë (të përshkruar nga Ministri Stojço Kacarov - red.)". Nëse vërtetohet se transplantimet janë të paligjshme, kjo do të thotë që spitali "Llozenec" ka qenë një kanal i trafikimit të organeve, tha Paskaleva. Ajo e përshkroi anashkalimin e listave të pritjes për transplantime si alarmante dhe skandaloze.

"Duke folur për transplantime, ka një fjalë kyçe - besim. Për të pasur një dhurim, duhet të ketë besim, dhe ky skandal e vret besimin. Kjo është një gjë monstruoze që ka ndodhur ". Ky koment u bë për BNR nga i vetmi bullgar i transplantuar dy herë - Georgi Peev nga qyteti Haskovo, i cili nuk e fshehu se ishte i shokuar nga informacioni.

"Shteti duhet të ketë një qëndrim njerëzor ndaj transplantimeve. Kur të rivendosim besimin në kujdesin shëndetësor, atëherë do të zgjidhet edhe problemi lidhur me transplantimet. Tani për tani kjo nuk është e mundur. Zinxhiri është prishur", është kategorik Georgi Peev.

Besimi po ulet, thotë avokatja Nadezhda Sllavçeva, e cila ka një doktoraturë në kujdesin shëndetësor ndërkufitar. Ajo vuri në dukje se legjislacioni bullgar mbi transplantimet është i mirë, por respektimi i tij është i diskutueshëm. Duke komentuar dyshimet se në dokumente njerëz të rastësishëm janë paraqitur si të afërm që të bëhen donatorë, ajo tha:

"Të gjitha procedurat në lidhje me transplantimin dokumentohen. Duhet të jemi të qartë se mjekët nuk janë ata që e kërkojnë këtë të vërtetë. Në këtë kuptim, mjekët nuk mund t’i kundërshtojnë provat në dokumente, por ata mund të njoftonin autoritetet e tjera kompetente. Përveç kësaj tek ky informacion kanë qaseje edhe njerëz të tjerë dhe ai mund të provokojë dyshimin jo vetëm të mjekëve, por edhe të nëpunësve të tjerë", saktësoi avokatja Sllavçeva.

Ajo vuri në dukje se tani për tani nuk mund të komentojë nëse bëhet fjalë për krim me dashje, shkujdesje, ose ndonjë automatizim në procedurë dhe pret të dhënat zyrtare e autoriteteve hetuese.

Shpresa e madhe e njerëzve që presin një transplantim në Bullgari është që vendi ynë së shpejti të bëhet pjesë e Eurotransplantit. A do të ndikojë skandali aktual mbi mundësitë për këtë anëtarësim?

"Në të vërtetë Eurotransplantimi është një ëndërr dhe tani për tani jemi mjaft larg këtij anëtarësimi," komentoi avokatja Sllavçeva. - Problemi është se ne nuk përmbushim një nga kriteret kryesore - numrin e transplantimeve të kryera për 1 milion njerëz. Ky është kriteri që vendi ynë nuk plotëson, dhe mendoj se me rastet që po diskutojmë do të largohemi edhe më shumë. Jo sepse do të krijohet një qëndrim negativ ndaj vendit tonë, por sepse vetë shoqëria jonë do të tërhiqet dhe besimi do të zhduket, gjë që nuk duhet të ndodhë."

Përpiloi: Elena Karkallanova /mbi intervistat e Veselina Millanovës dhe Daniella Goleminovës, BNR – “Horizont”/

Përgatiti në shqip: Vesella Mançeva