Këto ditë u publikuan prognoza ekonomike e vjeshtës e Komisionit Evropian dhe korniza afatmesme makroekonomike trevjeçare e Ministrisë së Financave të Bullgarisë. Në Bruksel presin që vendi ynë të shënojë rritje të Produktit të Brendshëm Bruto (PBB) prej 3.8% këtë vit dhe një përshpejtim deri në 4.1% vitin e ardhshëm. Financierët bullgarë janë pak më optimistë dhe parashikojnë se në vitin 2021 rritja reale e PBB-së do të arrijë 4%, dhe në 2022 - 4.9%.
Në të dy dokumentet, rritja pritet të gjenerohet nga investimet publike dhe private, ndërsa shpresat kanë të bëjnë kryesisht me fondet e BE-së në kuadër të Planit të Rimëkëmbjes dhe Qëndrueshmërisë. Parashikimi është i mirë në sfondin e rënies ekonomike të regjistruar vitin e kaluar, por do të ishte një arritje relativisht modeste krahasuar me ritmet shumë më të shpejta të rritjes ekonomike të një numri vendesh të BE-së, të cilat arrijnë 6-8% rritje të PBB-së në vit.
Këtë vit, pas disa vitesh amulli të çmimeve, inflacioni do të arrijë 3.8%, sipas Ministrisë së Financave. Analistët evropianë parashikojnë nivele më modeste të shtrenjtimit të jetesës në Bullgari, me pritjen që viti të mbyllet me 2,4%, me një parashikim për vitin e ardhshëm prej 2,9% - sërish për shkak të energjisë së shtrenjtë dhe efekteve dytësore të kësaj. Këto parashikime duken paksa të çuditshme në sfondin e faktit se inflacioni vjetor për muajin tetor është 6%, dhe 80% e kompanive bullgare janë të shqetësuara për çmimet e energjisë dhe të lëndëve të para vitin e ardhshëm, sipas një sondazhi evropian.
Rritja e çmimeve të mallrave ka dy aspekte - pozitive dhe negative. Së pari, nga këndvështrimi i konsumatorit, kjo do të thotë një rënie të fuqisë blerëse të tyre, e cila është një nga më të ulëtat në Evropë. Megjithatë, tani për tani, sipas ekspertëve të Institutit për Ekonominë e Tregut, rritja e çmimeve mbetet prapa, në krahasim me rritjen e pagave /paga mesatare mujore bruto në vend është 1543 leva, ose 789 euro/ dhe, në fund të fundit, fuqia blerëse e konsumatorëve bullgarë po vazhdon të rritet lehtë.Aspekti i dytë i inflacionit është se rritja e çmimeve të mallrave çon në rritje të të ardhurave nga TVSH-ja për thesarin e shtetit. Kjo është e mirë për financat publike, sepse në kushtet e krizës së Covid-it shteti është detyruar të investojë gjithnjë e më shumë para në masat kundër epidemisë, në sistemin shëndetësor dhe në mbështetje të sektorëve më të prekur të ekonomisë. Edhe pse Bullgaria është ndër shtete e fundit në Evropë për nga përqindja e të vaksinuarve dhe ndër të parat për nga numri i vdekjeve si pasojë e pandemisë, shpenzimet për shkak të luftimit të koronavirusit rëndojnë mbi financat publike. Nuk është rastësi që shteti gjithnjë e më shpesh përdor kredi të brendshme për të kompensuar mungesën e mjeteve. Vetëm të hënën u emetuan obligacione të reja shtetërore për 500 milionë leva (mbi 250 milionë euro) dhe kështu borxhi i ri i akumuluar gjatë vitit arriti në 3.3 miliardë leva (mbi 1.7 miliardë euro).
Ekonomia bullgare përballet me një sërë sfidash, duke përfshirë paqëndrueshmërinë politike gjatë gjashtë muajve të fundit. E gjithë kjo nuk mund të mos ndikojë në klimën e biznesit në vend. Tani për tani ekonomia jonë po përballet me problemet, në pritje të një sigurie dhe parashikueshmërie më të madhe.
Përgatiti në shqip: Vesella Mançeva
"Vendi ku lind dielli" – kështu bukur dhe përshkrueshëm tingëllon për bullgarin emri i Japonisë. E quajnë gjithashtu "kopshtin e qershive" dhe "fuqi e madhe financiare". Të gjitha këto përcaktime janë të vërteta dhe nxisin interesin e shumë bullgarëve, të..
Shërbimet bankare në vendin tonë janë ndër më të arritshmet në BE, sipas një analize të Shoqatës së Bankave në Bullgari. Sipas saj, bankat në vendin tonë ofrojnë normat më të ulëta të interesit në Evropë për kreditë e dhëna rishtazi për familjet për..
Bullgaria nuk do të detyrohet të mbyllë termocentralet me qymyr ose impiantet e ngrohjes qendrore me qymyr gjatë periudhës së dimrit, tha ministri i energjetikës Zheço Stankov para fillimit të forumit RE-Source Southeast 2025, i cili po zhvillohet në..
Pabarazitë në të ardhurat në Bullgari për një periudhë janë më të ulëta se mesatarja botërore gjatë 20 viteve të fundit, por pas vitit 2014 ato kanë qenë..
Potenciali inovativ dhe shkencor bullgar në bujqësi u prezantua nga Ministria e Bujqësisë dhe Akademia Bujqësore gjatë javës tematike "Nevojat e Jetës:..
Banka Botërore uli parashikimet e saj për rritjen ekonomike të ekonomisë globale dhe të Bullgarisë për këtë dhe vitin e ardhshëm. Vlerësimi është pjesë e..