Austria është ndër investitorët kryesorë në Bullgari. 4.6 miliardë euro janë investimet e 350 kompanive austriake. Mbi 20 000 bullgarë punojnë në kompani austriake. Situata ekonomike dhe politike në Bullgari është “inkurajuese” – kështu e vlerësojnë vendin tonë kompanitë austriake që operojnë tek ne.

Sipas tyre, problemet kryesore janë burokracia e madhe shtetërore, mungesa e stafit të kualifikuar, produktiviteti i ulët dhe korrupsioni. Shqetësuese janë edhe çmimet e larta të energjisë dhe lëndëve të para. Një e treta e kompanive presin përmirësim të klimës ekonomike dhe gjysma besojnë se mjedisi ekonomik do të mbetet i pandryshuar, gjë që duke pasur parasysh situatën aktuale mund të interpretohet si një shenjë e mirë.

Kjo u bë e qartë në një aktivitet në Sofje, të organizuar nga Përfaqësia Tregtare e Austrisë, në të cilin mori pjesë Andrea Wicke - Ambasadore e Austrisë në Bullgari dhe Ministri i Inovacioneve Daniell Llorer. Të dhënat bazohen në një vrojtim vjetor për mjedisin ekonomik dhe klimën e investimeve, i cili tradicionalisht kryhet mes kompanive austriake në vendin tonë.