Presidenti ukrainas Vollodimir Zelenski tha, se diskutimet për furnizimin e tankeve të rënda perëndimore për Ukrainën “duhet të përfundojë me marrjen e një vendimi. Aleatët disponojnë numrin e nevojshëm të tankeve që Ukraina këmbëngul”, tha Zelenski në fjalimin e tij të mbrëmjes. Deklaratat e presidentit ukrainas erdhën pas publikimeve në botimin gjerman “Der Spiegel” dhe atë amerikan “The Wall Street Journal” se Berlini dhe Uashingtoni do të furnizojnë Kievin me 14 tanke “Leopard 2 A6” nga Bundesveri dhe 30 tanke “Ejbrams” nga Pentagoni. Hapi pas dorëzimit të paralajmëruar të 14 tankeve britanike “Çallengjer 2” është një ftesë për aleatët e tjerë perëndimorë që gjithashtu t’i dorëzojnë armët e rënda Ukrainës.

Ministri i Jashtëm ukrainas Dmitro Kuleba shkroi në Facebook-un e tij, se BE po shqyrton furnizimin e Kievit me avionë luftarakë F-16. Kuleba i referohet korrespondencës së tij në internet me një koleg të BE-së. Qysh më 20 janar, ministri i jashtëm holandez Vopke Hukstra njoftoi dërgimin e mundshëm të F-16 në Kiev, transmeton AFP.

Furnizimi i tankeve “Leopard 2” për Ukrainë do të lërë një “gjurmë të pashlyeshme” në marrëdhëniet ruso-gjermane, tha zëdhënësi i Kremlinit, Dmitrij Peskov.

Ai shtoi se marrëdhëniet me Gjermaninë tashmë janë “në pikën e tyre më të ulët” dhe gjithashtu nuk ka “dialog thelbësor” me vendet e tjera të BE-së dhe NATO-së.