Dy vende pune, shtëpi, bashkëshort, fëmijë dhe qen - kjo është përditshmëria e Nenka Rashkovës në Gjermani. Ashtu si shumica e bullgarëve jashtë vendit, familja e re ka vendosur të largohet nga Bullgaria për arsye shumë prozaike:

“U larguam para 4 vitesh sepse nuk gjenim mundësi dhe kishim marrë kredi, si çdo familje bullgare. Vendosëm të jetonim në Gjermani sepse burri im mori një ofertë pune dhe u vendosëm këtu dy ditë pasi djali ynë i mrekullueshëm mbushi 1 vjeç. Vështirësitë me të cilat ballafaqohet në fillim çdo bullgar jashtë vendit janë gjuha, gjithçka është e panjohur, nuk ka miq, të njohur për të telefonuar, çdo gjë duhet ta bëjë vetë”, thotë bashkëbiseduesja jonë.

Dashuria mes Nenkës dhe bashkëshortit të saj Rado ndizet me shikim të parë. Ajo është aq e fortë dhe e vërtetë sa vajza e re lë punën e saj në sektorin e IT në Bullgari dhe nis një aventurë të jashtëzakonshme:

“Ai ishte një shofer ndërkombëtar dhe ne ishim të qartë se një marrëdhënie në distancë nuk mund të zgjaste, kështu që unë u nisa me të. Për 1 vit kam udhëtuar në 14 vende, kam pasur shumë përjetime interesante - të mira dhe të këqija, por kujtimet e mira mbizotërojnë. Dhe pas atij një viti morëm vesh se u nisëm dy dhe u kthyem tre.”

Në Bullgari, Nenka Rashkova mori një arsim të shkëlqyer. Është kontabiliste dhe specialiste në “Hidrogjeologji dhe Gjeologji Inxhinierike”. Por në Gjermani, ajo punon në një kompani lokale të hotelerisë dhe tri herë në javë në një kompani pastrimi. “Erdha në Gjermani për të pastruar, por ndihem shumë mirë”, thotë ajo duke qeshur.

Këtu, larg Bullgarisë, Nani, siç e quajnë të gjithë, rizbulon gjithashtu hobin e saj të dashur – të krijojë suvenire më të ndryshme dhe piktura të mahnitshme prej fijesh.

Punimet e bukura të Nenkës janë në pronësi të dhjetëra njerëzve nga të gjitha anët e botës dhe kënaqësia më e madhe për zejtaren vjen nga mbështetja e familjes së saj dhe falënderimet dhe fotot e dërguara nga klientët. “Kjo më jep nxitje dhe kënaqësi të bëj gjithnjë e më shumë gjëra dhe t'i bëj ato gjithnjë e më të ndryshme”, thotë ajo.

Edhe pse larg vendlindjes së saj, Nenka Rashkova interesohet për situatën në vendin tonë:

“Ajo që po ndodh tani në Bullgari është një tragjedi për mua. Ne, bullgarët që jetojmë jashtë, shpeshherë themi se Bullgaria na dëboi nga atdheu. Por në realitet, jo Bullgaria, por pushtetarët tanë na dëbuan. Më vjen keq për Bullgarinë, është një vend shumë i bukur, por për mua personalisht, të gjithë këta pushtetarë duhet të largohen nga parlamenti dhe të vijnë njerëz të rinj që të mendojnë në të vërtetë për të ardhmen e bullgarëve, dhe jo vetëm për përfitimin e tyre. "

Nenka Rashkova thotë se nuk mban lidhje me bullgarët e tjerë në Gjermani.

“Proverbin “Iku nga bullgarët jashtë” ne e ndjemë. Në fillim, kur jetonim këtu, kishim kontakte me shumë bullgarë, por mënyra jonë e të menduarit disi ndryshon jashtë vendit, nuk ndihmojmë njëri-tjetrin dhe kur dikush arrin ndonjë sukses, tjetri mendon se si të përfitojë, krijohen konflikte, prandaj vendosëm të jemi të pavarur.”

Ju mungon Bullgaria?

“Jo – është kategorike Nenka Rashkova. - Sado e ashpër të tingëllojë, më vjen keq vetëm për të afërmit e mi. Sa herë shkojmë në shtëpi për pushime verore, jemi të zhgënjyer. Thjesht këtu, në Gjermani, të gjitha ëndrrat tona u realizuan dhe trishtimi për Bullgarinë u zhduk.”

Përgatiti në shqip: Vesella Mançeva

Foto: Piktura prej fijesh