Në takimin me komisionerin evropian për buxhetin dhe administratën, Johannes Hahn, i cili ishte për vizitë në Bullgari, kryeministri Nikollaj Denkov dhe zëvendëskryeministrja Maria Gabriel treguan se prioriteti kryesor i qeverisë është anëtarësimi i Bullgarisë në Shengen që këtë vit. Nga ana e tij, komisioneri evropian Johannes Hahn përshëndeti formimin e një qeverie të rregullt bullgare me orientim të qartë evropian dhe premtoi mbështetje nga Komisioni Evropian (KE). Javën e ardhshme, KE pritet të publikojë një përmbledhje të Kornizës Financiare Shumëvjeçare të Bashkimit Evropian, e cila përcakton kufijtë e sipërm të shpenzimeve të Bashkimit nga viti 2021 deri në vitin 2027. Është parashikuar krijimi i një Fondi Evropian të Sovranitetit për të financuar kompanitë që punojnë në fusha me potencial të lartë si gjelbërimi dhe bioteknologjia dhe kalimi në një ekonomi digjitale. Gjithashtu do të vendoset fleksibilitet më i madh në përdorimin e fondeve nga Fondi Evropian i Zhvillimit Rajonal.