Bullgaria pret që doganierë nga Gjermania, Austria dhe Holanda të monitorojnë dhe forcojnë sigurinë e kufirit të jashtëm të BE-së me Turqinë.

Në Bruksel, në takime personale me kancelarët federalë të Gjermanisë, Ollaf Sholc, të Austrisë, Karll Nehamer dhe me kryeministrin e Holandës, Mark Rjute, kryeministri Nikollaj Denkov ftoi ekspertët e huaj. Bisedimet për përfshirjen e doganierëve gjermanë në kufirin bullgaro-turk u mbajtën nga qeveria e mëparshme e rregullt e Kiril Petkovit, por u ndërprenë gjatë qeverisjes së kabineteve teknike.

“Ne kemi nevojë për ekspertizë dhe ndihmë të drejtpërdrejtë në përpunimin e vëllimit të madh të ngarkesave që kalon përmes Bullgarisë, veçanërisht pas fillimit të luftës në Ukrainë”, tha Denkov. Kjo do të zgjidhë problemin e besimit të partnerëve tanë në Bullgari. Po punohet gjithashtu me Evropolin për një qendër evropiane të koordinimit me bazë në vend për të luftuar trafikimin e njerëzve, tha kryeministri.