Programi i ditës
Madhësia e tekstit
Radioja Kombëtare Bullgare © 2024 Të gjitha të drejtat janë të rezervuara

Bullgaria tashmë ka një “buxhet të arsyeshëm” për vitin 2023

Foto: BGNES

Pas një mbledhjeje që zgjati afro 24 orë, deputetët më në fund miratuan buxhetin për këtë vit. Kuadri financiar llogaritet me një deficit prej 3 për qind - në bazë të përllogaritur, duke ruajtur një pjesë të madhe të programit të kapitalit të propozuar fillimisht. Buxheti pritet të publikohet në Fletoren e Shtetit brenda datës 1 gusht.Ndër ndryshimet e miratuara është rritja e pagave të punonjësve të policisë, ushtarakëve, atyre që punojnë në Agjencinë Kombëtare të të Ardhurave, dogana, Agjencinë Shtetërore për Sigurinë Kombëtare, Ndihmën Emergjente, Inspektimet Shëndetësore Rajonale, burgje, rojën e gjykatave dhe disa struktura të tjera publike nga 1 gushti. Shpenzimet e reja të miratuara nga deputetët arrijnë në mbi 375.6 milionë leva dhe do të jenë në llogari të më pak shpenzimeve kapitale. Dita nuk kaloi pa probleme, gjë që bëri të nevojshme një takim urgjent të liderëve të GERB dhe PP-DB - Bojko Borisov, Kiril Petkov dhe Hristo Ivanov. Arsyeja ishte, që në komisionin parlamentar financiar deputetët e partisë së Borisovit bojkotuan propozimet e ministrit të financave Asen Vasilev për pjesën e të ardhurave të thesarit. Kjo bëri që ministri i financave të deklaronte se nuk e mbështet më projektbuxhetin e shtetit. Megjithatë, pas takimit të lidershipit u bë e qartë se të gjitha propozimet e Asen Vasilev për masat e të ardhurave do të pranohen me korrigjime të caktuara dhe Bullgaria do të ketë një buxhet që do t’u shërbejë qytetarëve bullgarë. Tekstet e diskutueshme për GERB-in kishin të bënin me dëshirën e Asen Vasilev që kompanitë me staf prej 50 e më shumë persona të detyrohen të paguajnë pagat e punonjësve vetëm me transfertë bankare. Ky detyrim duhej të zbatohet edhe për punëdhënësit që ofrojnë shërbime restoranti dhe hotelerie, pavarësisht se sa njerëz punojnë për ta. Kritikat kryesore ishin se kjo nuk do të çonte në eliminimin e fenomenit “rroga në zarf”, por do të rëndonte biznesin dhe se në qytetet e vogla nuk ka as ATM dhe as terminale POS dhe tarifat bankare janë shumë të larta dhe do të çojnë në varfërimin e punonjësve me paga më të ulëta. Megjithatë, kufizimi mbeti për kompanitë me 100 dhe më shumë punonjës. Deputetët miratuan edhe taksimin e fitimeve të tepërta të kompanive energjetike për të rimbushur fondin “Siguria e Sistemit Energjetik”. Qëllimi është që biznesi të kompensohet me fondet e tij nëse çmimi i energjisë elektrike kalon 200 leva për megavat orë.

Në fund ministri i financave Asen Vasilev deklaroi:

Asen Vasilev

“Buxheti është brenda parametrave të përcaktuar fillimisht me një deficit 3 për qind, një program serioz kapital dhe rishpërndarje të një pjese të kostove kapitale për pagesë shtesë, të cilën parlamenti e bëri në shumën rreth 300 milionë leva. Një pjesë e madhe e masave fiskale u mbajtën gjithashtu në mënyrë që të mblidhen të ardhurat.”

Makroekonomisti Georgi Ganev , i cili është anëtar i grupit parlamentar të “Po e vazhdojmë ndryshimin - Bullgaria Demokratike” dhe anëtar i komisionit të buxhetit në Kuvendin Popullor, në një intervistë për BNR-Plovdiv tha:

Georgi Ganev

“Buxheti 2023 është zgjidhja e mundshme e arsyeshme në situatën në të cilën ndodhemi. E dimë që ajo nuk është aspak e thjeshtë. Dhe e gjithë kjo për shkak të vendimit të kabinetit zyrtar, të mos paraqesë buxhet të rregullt kur ishte koha ligjore, përkatësisht – fundin e tetorit të vitit paraprak.”

Sipas ekonomistit Krasen Stançev, miratimi i buxhetit ishte imperativ për të mos shpërbërë qeverinë.

Krasen Stançev

“Problemi nuk është deficiti 3 për qind dhe sigurimi i tij, por problemi është se që nga viti 2012 kufizimi për Bullgarinë, që korrespondon me stabilitetin e të gjithë sistemit, është 2 për qind deficit buxhetor. Ka edhe gjëra të tjera që lidhen me stabilitetin e sistemit”, vuri në dukje Stançev për BNR.

Sipas tij, ky është një “buxhet për 3 muaj” dhe në përputhje me rrethanat, disa gjëra duhet të parashikohen deri në fund të vitit 2025 (me synimin e vënies së euros në qarkullim), ndër të cilat janë shpenzimet relativisht të ulëta të qeverisë, borxhi relativisht i ulët etj. Megjithatë, ai nuk ka asnjë shqetësim për buxhetin aktual.

“E sigurta në këtë buxhet janë shpenzimet”, theksoi ekonomisti. Lidhur me masat e propozuara për pjesën e të ardhurave, ai shpjegoi se nëse të ardhurat rezultojnë më të vogla, mund të çojë në marrjen e një kredie për financimin e detyrimeve korente.

Përpilues: Joan Kolev

Përgatiti në shqip: Svetllana Dimitrova

Foto: BTA, BGNES




Последвайте ни и в Google News Showcase, за да научите най-важното от деня!

Më shumë nga rubrika

Bullgaria ende nuk i plotëson kriteret për eurozonën

Bullgaria plotëson 3 nga kriteret e Mastrihtit për anëtarësim në eurozonë, por ende nuk i përmbush objektivat e stabilitetit të çmimeve dhe inflacionit, sipas një raporti të Komisionit Evropian, transmeton BTA. Bullgaria nuk i plotëson ende..

botuar më 24-06-26 2.57.MD

Marrim 65.2 milionë euro nga BE-ja për të forcuar rrjetin e transmetimit të energjisë elektrike

Bullgaria do të marrë 65.2 milionë euro nga BE për një projekt për forcimin e rrjetit të transmetimit të energjisë elektrike në mbështetje të integrimit të energjisë së rinovueshme, sipas një deklarate nga Komisioni Evropian. Paratë janë pjesë e një..

botuar më 24-06-24 2.19.MD

Është më realiste që Bullgaria të anëtarësohet në eurozonë në vitin 2026

Bullgaria mund të hyjë në eurozonë në fillim të vitit 2026. Sipas një studimi të Shoqatës së Tregtarëve të Mallrave Jo-Ushqimore, kjo është periudha reale në të cilën vendi ynë do të mund të përmbushë kriteret për Eurozonën. Sipas sondazhit, 25% e të..

botuar më 24-06-18 6.16.MD