Tren retro dhe shfaqja historike në Veliko Tërnovo me rastin e Ditës së Pavarësisë

botuar më 23-09-23 6.45.PD

Foto: museumvt.com

Me rastin e 115 vjetorit të shpalljes së Pavarësisë së Bullgarisë, kryeqyteti ynë i vjetër ka përgatitur një program të pasur festiv me argëtime. Më 23 shtator (e shtunë), në orën 9:15 në stacionin Trapezica në Veliko Tërnovo, do të paraqitet ngjarja historike e ardhjes së Princit Ferdinand, Kryeministrit Aleksandër Malinov dhe zyrtarëve, mirëpritja e tyre nga kryetari si dhe qytetarët e Tërnovos dhe leximi i Manifestit për shpalljen e pavarësisë së Bullgarisë dhe shpalljen e Ferdinandit mbret bullgar.

Në lidhje me këtë ngjarje historike, Veliko Tërnovo do ta festojë Ditën e Pavarësisë me një tjetër atraksion. Një tren retro me një lokomotivë me avull, i cili përfshin vagona nga seria "Korona Express" - vetura personale e mbretit Boris III dhe mbretëreshës Joana dhe një vagon i klasit të parë, do të niset në itinerar: stacioni Gorna Orjahovica – stacioni Trjavna dhe e anasjelltas.

Treni retro do të niset për në stacionin Veliko Tërnovo, ku pritet të mbërrijë pas përfundimit të shfaqjes historike. Deri në orën 11:00 të gjithë do të mund të shikojnë vagonët retro dhe të bëjnë foto me aktorët dhe pjesëmarrësit në rikrijimet historike.

Përpiloi: Veneta Nikollova

Përgatiti në shqip: Kostandina Bello

Foto: museumvt.com

Последвайте ни и в Google News Showcase, за да научите най-важното от деня!