Gjeneral majori Dragos Dumitru Jacob, komandant i Korpusit Shumëkombësh Juglindor në qytetin e Sibiut, tha se në të ardhmen rumunët dhe bullgarët duhet të ndjehen më të sigurt pasi struktura e re komanduese e NATO-s filloi të funksionojë. Në hapje, ai theksoi rolin e shtabit për të udhëhequr operacionet tokësore në Rumani dhe Bullgari në rast lufte. "Ne jemi të gatshëm të kryejmë misionet për të cilat jemi të përgatitur. Ne duhet të udhëheqim operacionin tokësor në territorin e Rumanisë dhe Bullgarisë, duke udhëhequr deri në 5 divizione aleate të NATO-s", shpjegoi komandanti. “Në bazë të planeve, nëse situata e kërkon, ne jemi të gatshëm të mbrojmë territorin e Rumanisë dhe Bullgarisë me armë në dorë”, tha Jacob. Struktura e NATO-s në Sibiu ka një buxhet prej 350 milionë euro dhe do të përfshijë trupa nga 17 vende aleate, raporton BTA.