Ambasada e Republikës së Kosovës në Sofje shënon 16 vjetorin e pavarësisë së Kosovës. Në pritjen solemne të organizuar nga Ambasada me praninë e tyre e kanë nderuar drejtues e zyrtarë të institucioneve, ambasadorë e diplomatë të vendeve mike të Kosovës, si dhe shumë përfaqësues të tjerë të mediave, kulturës, biznesit, shoqërisë civile dhe diasporës. 

Ambasadori Haxhi Bajraktari në fjalët e tij përshëndetëse shprehu, se ndjehet i privilegjuar që së bashku dhe mes miqsh shënohet 16-vjetori i Pavarësisë së Republikës së Kosovës. Kjo është dita më e rëndësishme në historinë e vendit, shtyllat e të cilit janë ndërtuar mbi sakrificën, vendosmërinë dhe kontributin e të gjithë qytetarëve. 

“Rruga drejt krijimit të vendit tonë ka kaluar shumë sfida dhe vuajtje, e njëkohësisht e mbushur me dashuri të jashtëzakonshme për Atdheun! Të nderuar të ftuar, për mua është vetëm muaji i pestë si Ambasador në Sofje dhe gjatë kësaj periudhe relativisht të shkurtër, më duhet të them se tashmë e kam ndjerë mirësinë që kanë treguar ndaj meje të gjitha institucionet e Republikës së Bullgarisë. Në fakt, kjo nuk është diçka e re, pasi mbështetja e Bullgarisë për Kosovën tashmë është bërë traditë. Bullgaria i ka qëndruar përkrah Kosovës në çdo proces, në çdo iniciativë, në çdo tryezë. Prandaj, në emër të Institucioneve të Republikës së Kosovës ju falënderoj dhe ju jemi shumë mirënjohës!”- tha Ambasadori Bajraktari. 

Foto: Facebook/Ambasada e Kosovës në Sofje

Publikoi në shqip: Kostandina Bello