E quajnë Virgjëreshën e Shenjtë Nëna e Jetës së vërtetë, e cila me lutjet e saj shpëton shpirtrat e njerëzve nga vdekja. Ajo është më e dashura dhe më e lavdëruara pas Zotit, tek e cila të gjithë i drejtohen. Kisha e nderon atë më 15 gusht, Ditën e Fjetjes së saj, kur Biri i Zotit i lindur prej saj e çon shpirtin e saj në Mbretërinë Qiellore. Edhe pse nga një gjumë i qetë kaloi në jetën e përjetshme, Nëna e Zotit mbetet e palodhur në lutjet e saj për shpëtimin e njerëzimit. Që në të njëjtën ditë, ndodhën shumë mrekulli dhe ogure - të sëmurë u shëruan, të verbërve iu dha shikimi vetëm me prekjen e qefinit të saj. Dhe ashtu si Vetë Shpëtimtari u ringjall me lavdi në ditën e tretë, kështu Ai ringjalli edhe Nënën e Tij. Në kujtim të kësaj ngjarje madhështore, apostujt vendosën festën e "Fjetjes së Zonjës së Bekuar".

Kjo ditë është e mbushur me shumë gëzim dhe shpresë për bullgarët, ajo është e dashur dhe e nderuar edhe nga myslimanët në vendin tonë:

“Nëna e Shenjtë e Zotit është një mbrojtëse e dashur e çdo të krishteri, e mbarë njerëzimit – theksoi në një intervistë të posaçme për Radio Bullgarinë, Shkëlqesia e Tij Peshkopi i Branickut Pahomij, vikar i parë i Mitropolitit të Sofjes. - Kushdo që i drejtohet asaj me lutje dhe besim, ndjen mbrojtjen e saj, ndihmën e saj, dashurinë e saj. Njerëzit kanë qëndrimin dhe respektin e tyre për Nënën e Shenjtë, sepse ajo mbante Birin e Zotit në barkun e saj. Edhe besimtarët e feve të tjera besojnë në Virgjëreshën e Shenjtë dhe, duke iu drejtuar me dashuri, ajo përgjigjet për t'u treguar atyre të vërtetën. Ajo i dëgjon lutjet, por jo për të plotësuar ndonjë nga nevojat tona materiale, por për të na hapur sytë ndaj njohjes së Zotit të Vërtetë.”

Veç se është mbrojtëse e nënave dhe e familjes, në momente të vështira dhe të rënda, Nëna e Shenjtë dëgjon lutjet e atyre që qajnë dhe atyre që u bëhet padrejtësi. Lidhja e gjallë me të janë ikonat e mrekullueshme me imazhin e saj, para të cilave shpesh kërkojmë ndërmjetësimin e saj: 

"Kemi vërtet shumë shembuj - pohon peshkopi Pahomij. - Ikonat mrekullibërëse, veçanërisht nga manastiret - Baçkovski, Trojanski dhe Rillski - mrekullitë e tyre i kemi parë në ngjarje të ndryshme. Çdo ikonë e Zotit, e Nënës së Shenjtë të Zotit, e shenjtorëve, e engjëjve është çudibërëse. Varet nga besnikëria dhe besimi ynë në Zotin, Nënën e Shenjtë të Zotit dhe shenjtorët, dhe ata përgjigjen. Natyrisht, ka edhe ikona të lavdëruara që me lutjet e besimtarëve, të njerëzve në sprovë, janë bërë më të lavdëruara. Prandaj laikët u drejtohen atyre me dashuri më të madhe dhe me besim më të madh. Dhe këto ikona e kanë ende këtë fuqi të bekuar edhe sot e kësaj dite."

Në Bullgari, festa e Fjetjes së Hyjlindëses njihet edhe si Nëna e Madhe e Zotit, sikur për të shprehur adhurimin dhe dashurinë e thellë për Nënën e Zotit. Dy javët para festës u kushtohen kreshmimit dhe lutjeve, përmes të cilave besimtarët përpiqen t'i ngrenë shpirtrat te Zoti:

“Kjo është një kohë e bekuar që njeriu duhet shpenzuar vërtet duke u përmbajtur nga ushqime të ndryshme, por mbi të gjitha duke drejtuar mendimet te Zoti, te Nëna e Shenjtë. Për t'i dhënë kuptim jetës shpirtërore në të cilën thirren të gjithë. Është mirë që gjatë kësaj periudhe ka liturgji, ka edhe një kanun lutjeje, i cili shërbehet çdo natë në kishat ,në manastiret, në mënyrë që të mund të heqim vërtet shqetësimet e jetës sonë të përditshme dhe ta ngremë mendjen te Zoti. Nga ne varet se si i mbajmë në mendje mendimet tona për Zotin dhe për Nënën e Shenjtë të Zotit, jo vetëm gjatë kësaj kreshme të shkurtër apo vetëm në festë, në mënyrë që t’i kërkojmë gjithmonë ndihmën.”

Kuptimi shpirtëror i festës së Nënës së Zotit është në dashurinë e saj të pamasë për njerëzit. Nëna e Zotit, e cila i dha jetë Jezu Krishtit, personit të dytë të Trinisë së Shenjtë, është lidhja midis Zotit dhe racës njerëzore.

Përgatiti në shqip dhe publikoi: Svetllana Dimitrova

Foto: Darina Grigorova, BGNES, arkiv