Në mbledhjen e jashtëzakonshme të Kuvendit Popullor, anëtarët e Këshillit zyrtar të Ministrave, të emëruar me dekret të presidentit Rumen Radev, së bashku me kryeministrin Dimitër Gllavçev, bënë betimin para deputetëve të popullit. Në prani të kreut të shtetit Rumen Radev dhe zëvendëspresidentes Ilijana Jotova, ministrat zyrtarë u betuan në emër të Republikës së Bullgarisë se do të respektojnë Kushtetutën dhe ligjet e vendit dhe në të gjitha veprimet e tyre do të udhëhiqen nga interesat e popullit. Në ceremoni u luajtën himnet e Bullgarisë dhe Bashkimit Evropian, pas së cilës seanca e Kuvendit Kombëtar u mbyll nga kryeparlamentarja Raja Nazarjan.

Para kësaj, duke hyrë në Kuvendin Popullor, presidenti Rumen Radev paralajmëroi se kriza politike nuk ka kaluar. Sipas presidentit, kjo krizë do të gjejë zgjidhje kur Asambleja Kombëtare të arrijë të formojë një shumicë të përhershme dhe të krijojë një qeveri të rregullt efektive. Sipas presidentit, kjo qëndrueshmëri është funksion i legjitimitetit të asaj mazhorance dhe kur pjesëmarrja në votime është e ulët, atëherë ndershmëria e votës ka një peshë të madhe. “Prandaj kam qenë i vendosur dhe vazhdoj të insistoj që lufta kundër votës së blerë të jetë prioritet”, theksoi Radev.

• Presidenti ka nxjerrë një dekret për emërimin e një kabineti të ri