Fondacioni Theodora von Auersperg fillon punën edhe në Bullgari

"Është mirë tа lëmë botën një vend më të mirë se sa ashtu si e kemi gjetur" - beson themeluesja e fondacionit Princesha Theodora von Auersperg.

botuar më 24-10-18 7.35.PD

Autor: Joan Kolev

Foto: princesstheodora.net

Mbrojtja e kafshëve dhe fëmijëve të pafavorizuar, si dhe promovimi i nismave të ndryshme kulturore, janë thelbësore për përmirësimin e mjedisit jetësor në vendin tonë. Rreth kësaj ideje u bashkuan pianistja e talentuar Nadezhda Canova dhe princesha Theodora von Auersperg, të cilat krijuan një degë në Bullgari të fondacionit të themeluar në Vjenë, me emrin e princeshës. Ambasadorë të vullnetit të mirë të fondacionit janë trajnerja emblematike e gjimnastikës ritmike Neshka Robeva dhe dirigjentja e korit Vanja Moneva.

Vanja Moneva, Teodora von Augsburg, Neshka Robeva dhe Nadezhda Canova

“Për fëmijët që janë rritur si jetimë ose pa dashuri të mjaftueshme në familje, komunikimi me kafshët është jashtëzakonisht i rëndësishëm, sepse ato japin dashuri, të mësojnë përqendrimin, përgjegjësinë. Nëse një fëmijë rritet me një kafshë, ai bëhet një i rritur vërtet i përgjegjshëm që i do kafshët, dhe deri diku edhe njerëzit. Ju e dini se nëse dikush keqtrajton një kafshë, ai me siguri po bën të njëjtën gjë edhe me njerëzit”, shpjegoi Nadezhda Canova, drejtore artistike e fondacionit, në një intervistë për Radio Bullgarinë.

Njohja e saj me princeshën, e cila ka lindur dhe ka jetuar në vendin tonë deri në moshën 8-vjeçare, ka ndodhur në një mënyrë mjaft interesante:

"Kemi komunikuar fillimisht online sepse ajo jetonte në SHBA. Më vonë u transferua në Vjenë për shkak të sëmundjes së nënës së saj dhe kështu arritëm të takoheshim personalisht - kujton pianistja. - Kjo ndodhi në sallën Musikferein në një koncert ku u luajt "Requiem" nga Giuseppe Verdi, me pjesëmarrjen e sopranos Krasimira Stojanova dhe dirigjent Riccardo Muti. Pas koncertit patëm një takim edhe me ta, së bashku me tenorin Kamen Çanev. Me një fjalë ishte një mbrëmje e paharrueshme, nga e cila do të lindin shumë gjëra të mira."

Dëshira e tyre për të ndihmuar kafshët e pastreha dhe interesi për këtë temë nuk shfaqet papritur. Që në vitin 2023, Princesha Theodora von Auersperg nën patronazhin e saj zhvillon një koncert në të cilin marrin pjesë muzikantë të njohur klasikë vendas, përfshirë Nadezhdën, të titulluar "Dëgjo muzikë, shpëto një putër".

“Organizuam një koncert bamirësie dhe paratë e mbledhura i shpërndamë në tre strehë kafshësh në qytetet përkatëse. Koncertet u mbajtën në qytetet Sofje, Pazarxhik dhe Vidin, ku interesi ishte shumë i madh dhe sallat ishin plot.

Në të janë pjesë disa nga muzikantët më të mirë bullgarë, duke përfshirë pianistët Borisllava Taneva dhe Margarita Ilieva, flautistin Javor Zhelev, trumpetistin Petër Makedonski, klarinetistin Rosen Ideallov, flautisten Ana-Maria Krajçeva dhe të tjerë.

Kur ishte rreth 18 vjeç, princesha zbuloi se ajo ishte e birësuar dhe se babai i saj biologjik ishte Princi Anton Franz von Auersperg. Ai vendos ta njohë atë si vajzën e tij dhe t'i japë asaj titullin që i takon.

"Që atëherë, ajo vendosi që do ta përdorte këtë titull për të bërë diçka të vlefshme. Ajo vetë është shumë modeste dhe gjëja kryesore që e emocionon është qëllimi i fondacionit - të ndihmojë. Ajo beson se është mirë ta lëmë botën një vend më të mirë se sa e kemi gjetur”, – theksoi Nadezhda Canova.

Teodora von Auersperg dhe Nadezhda Canova

Viti 2025 do të jetë dinamik dhe plot organizime të ndryshme për fondacionin, është e bindur pianistja:

“Në vitin 2025 do të mbajmë një tjetër koncert nga seria “Dëgjo muzikë, shpëto një putër”, po planifikojmë koncerte dhe mbrëmje gala në Austri dhe Gjermani. Në një të ardhme më të largët planifikojmë të zgjerojmë aktivitetet e fondacionit në Spanjë dhe SHBA”.

I urojmë suksese fondacionit dhe do të vazhdojmë të ndjekim me interes aktivitetet e tij!

Foto: princesstheodora.net, arkiva personale e Nadezhda Canovës

Përgatiti në shqip dhe publikoi: Kostandina Bello

Последвайте ни и в Google News Showcase, за да научите най-важното от деня!

Ndaje

Fondacioni Theodora von Auersperg fillon punën edhe në Bullgari

"Është mirë tа lëmë botën një vend më të mirë se sa ashtu si e kemi gjetur" - beson themeluesja e fondacionit Princesha Theodora von Auersperg.

Më shumë nga rubrika

Protesta para Teatrit Popullor “Ivan Vazov” u kthye në trazira para premierës së pjesës “Armët dhe njeriu”

Një ekspeditë polare bullgare eksploroi Kontinentin e Akullit për herë të 33-të

Antarktida është motori i ndryshimeve klimatike

Elegjia për Krahinat Perëndimore tingëllon si një requiem

Nuk ka qartësi se cila pjesë e trashëgimisë kulturore bullgare në Ukrainë është ruajtur për brezat e rinj