Një parlament edhe më shumëngjyrësh u përvijua nga vota e zgjedhësve në zgjedhjet e parakohshme parlamentare të 27 tetorit. Parashikimet fillestare ishin për një Kuvend Popullor me 9 parti, por rezultatet që Komisioni Qendror i Zgjedhjeve (KQZ) shpalli pas përpunimit të të gjitha protokolleve përvëluan anëtarët dhe simpatizantët e partisë “Veliçie”. Me rezultat 3.999%, d.m.th. vetëm disa dhjetëra vota, nuk i mjaftuan për të kapërcyer barrierën prej 4%, që të ketë përfaqësues të vet në parlament. Kështu, Bullgaria do të ketë një Kuvend Popullor me tetë parti. Në të hyjnë GERB-SDS, PP-DB, "Vëzrazhdane", "Ka një popull të tillë", BSP, dy fraksionet e të ashtuquajturës "balancuese në politikën bullgare" Lëvizja për të Drejta dhe Liri (DPS) - Aleanca për Të Drejtat dhe Liritë, DPS - Fillimi i ri dhe partia e tetë "MEÇ".

Vota e bullgarëve jashtë vendit ka një ndikim të rëndësishëm në shpërndarjen e forcave politike në parlamentin bullgar, veçanërisht kur bëhet fjalë për rezultatet e partive më të vogla. Këtu duhet shtuar edhe votën e turqve bullgarë, të cilët tradicionalisht janë shumë aktivë në pjesëmarrjen e tyre në zgjedhje. Kjo është arsyeja pse Turqia është vendi ku hapen më shumë qendra votimi – për votën e sapo kaluar të parakohshme ishin 168.

• “Aleanca për të Drejta dhe Liri” kryeson votimin jashtë vendit

Ishin ata që përcaktuan forcën kryesore politike në preferencat e bullgarëve jashtë vendit - me protokollet e përpunuara 100% të votimit jashtë vendit, bashkatdhetarët tanë zgjodhën "Aleancën për të Drejta dhe Liri" në vend të parë me 22.65%. Pas tyre është koalicioni PP-DB me 20.80%, i ndjekur nga "Vëzrazhdane" me 13.29% dhe "DPS - Fillimi i Ri" me 9.96%. Mezi pas kësaj është fituesi i vërtetë i zgjedhjeve - GERB-SDS me 8.11% të votave jashtë vendit, e ndjekur nga "Veliçie" me 7.74%, "Ka një popull të tillë" me 7.12% dhe MEÇ me 4.80%.

Vota e bullgarëve jashtë shtetit kësaj radhe nuk arriti të bëhet lajm qendror - theksoi në një intervistë për Radio Bullgarinë sociologu Përvan Simeonov nga Agjencia “Gallup International Balkan”. I pyetur për të komentuar rezultatet e zgjedhjeve jashtë vendit dhe ndikimin e tyre në tablonë e përgjithshme paszgjedhore, ai e vuri theksin mbi të ashtuquajturat “parti të vogla” që hyjnë në garë me premtime për ndryshime të thella të status quo-së. Në këtë kuptim, është e rëndësishme t'i kushtojmë vëmendje disa gjërave:

“Personalisht unë jam disi i befasuar nga fakti që formacionet si “Veliçie” dhe MEÇ nuk kanë rezultate shumë të larta jashtë vendit, pasi pikërisht këtë lloj formacionesh kërkojnë bullgarët jashtë vendit dhe ata në përputhje me rrethanat i drejtojnë fushatat e tyre atje - kujtoi Simeonov. - Megjithatë, rezultati i tyre mbeti pak a shumë proporcional me atë të vendit. Duket se në vendin tonë aktiviteti pasoi thirrjet për votim më aktiv. Këto nuk ishin thjesht thirrje për një votë tjetër, por një provë serioze e mekanizmave demokratikë.”

Sociologu analizoi edhe dallimet në votat e qytetarëve brenda dhe jashtë vendit që zgjodhën të mbështesin partinë DPS - Fillimi i Ri, pas së cilës qëndron bashkëkryetari i shkëputur i Lëvizjes për të Drejta dhe Liri (DPS), Deljan Peevski, dhe koalicioni i kryetarit të nderit të lëvizjes Ahmed Dogan - Aleanca për të Drejta dhe Liri (APS). Bullgarët jashtë vendit dhe veçanërisht në Turqi votuan masivisht për kandidatët e Doganit.

“Shpjegimi është i thjeshtë: DPS-Fillimi i Ri është më larg asaj gjeneze etnike të DPS. Prandaj, turqit etnikë me nënshtetësi bullgare që jetojnë sot në Turqi vështirë se do të preferonin DPS - Fillim i Ri, megjithëse shihet se edhe atje ka jo pak vota për ta.”

Për sa i përket personalitetit të Ahmed Doganit, duhet të dimë se:

“Komunitetet e emigrantëve në Turqi nuk kanë qenë asnjëherë përkrahës të pakushtëzuar të Doganit, por kanë qenë besnikë - thekson sociologu. - Është e rëndësishme të kujtojmë qëndrimin zyrtar turk, i cili është për mosndërhyrje në punët e brendshme dhe në jetën politike bullgare, i cili me sa duket respektohet. Është e panevojshme të thuhet, megjithatë, se në fushën e politikës dhe diplomacisë, duhet parë gjithmonë qëndrimi i një kryeqyteti të caktuar ndaj figurave të caktuara. Gjatë viteve, ka pasur gjithmonë një tension mes këndvështrimit zyrtar turk dhe atij të Doganit, sepse ai kurrë nuk ishte plotësisht i sinkronizuar me narrativën zyrtare. Prandaj tani e tutje do të jetë shumë interesante se cili do të jetë qëndrimi i faktorëve turq ndaj dy formacioneve.”

Për momentin, votimi në fqinjin tonë jugor tregon një fitore 2 me 1 të koalicionit rreth Ahmed Dogan. Mirëpo, ka diçka të re – në krahasim me zgjedhjet e mëparshme, kur nga atje vinin nga 60 deri në 70 mijë vota, tani ato nuk arrijnë as në 50 mijë. Kjo tregon se, të paktën në Turqi funksionoi rregulli, që përplasja mes dy formacioneve më tepër largoi disa votues - shpjegoi Përvan Simeonov.

“Në Bullgari funksionoi diçka tjetër. Përplasja mes tyre tërboi të dyja palët dhe rezultati i tyre total është mbi 400 mijë vota, që është një madhësi e paprecedentë prej kohësh. Nëse do të ishin bashkë dhe do të kishin një rezultat të tillë, do të ishin forca e dytë politike me siguri, kështu që gjërat nuk janë aspak të sigurta politikisht.

Përgatiti në shqip dhe publikoi: Svetllana Dimitrova