Sipas informacioneve jozyrtare, Presidenca Hungareze e Këshillit të BE-së ka përgatitur vendimin për pranimin e plotë të Bullgarisë dhe Rumanisë në Shengen. Në draft-dokument thuhet se nga 1 janari 2025 hiqen kontrollet në kufijtë e brendshëm tokësorë me dhe midis Bullgarisë dhe Rumanisë, raporton BNT. Kujtohet gjithashtu se më 31 mars 2024, si një hap i parë drejt pranimit të dy vendeve në Shengen, u hoqën kontrollet e brendshme të kufirit ajror dhe detar me dhe ndërmjet dy vendeve. Dokumenti do të diskutohet më 27 nëntor në një takim të ambasadorëve të BE-së dhe përfundimisht do të votohet në takimin e ministrave të brendshëm të BE-së më 12 dhjetor në Bruksel.

Sipas burimeve të Presidencës Hungareze të Këshillit të BE-së, nuk priten komente të tjera nga shtetet anëtare, d.m.th. vendimi do të pranohet. Holanda gjithashtu ka konfirmuar se nuk ka kundërshtime, por kërkohet pëlqimi zyrtar nga parlamenti kombëtar i vendit përpara votimit më 12 dhjetor.