Pasi për të njëmbëdhjetën herë ia dolën të zgjedhin kryetaren e Legjislaturës së 51-të  të Kuvendit Popullor në personin e Natalija Kisellovës, të propozuar nga “BSP – E majta e Bashkuar”, deputetët votuan për zgjedhjen e nënkryetarëve të parlamentit. Ata u zgjodhën me 202 vota pro dhe një abstenim. Nga GERB-SDS nënkryetar do të jetë Raja Nazarjan, nga "Po e vazhdojmë ndryshimin - Bullgaria Demokratike" - Atanas Atanasov, nga "Vzrazhdane" - Conço Ganev, nga "BSP - E majta e Bashkuar" - Dragomir Stojnev, nga APS - Hajri Sadëkov, nga ITN - Nikoleta Kuzmanova dhe nga MEÇ - Radostin Vasilev.

“DPS – Fillimi i Ri” nuk propozuan kandidat për nënkryetar. Menjëherë pas zgjedhjes së Natalija Kisellova, deputetët e formacionit u larguan nga salla plenare dhe nuk morën pjesë në votim.

“Shpresoj se tani do të punojnë shpejt, do të fillojë ruleta dhe do të shkojmë në zgjedhje”, komentoi lideri i “DPS-Fillimi i ri” Deljan Peevski në margjinat e Kuvendit për zgjedhjen e kryetarit të Kuvendit Popullor. Kur u pyet nëse ka mundësi për një qeveri të rregullt, ai u përgjigj: "Nëse bien dakord në kabinete për të plaçkitur Bullgarinë. Një gjë është e sigurt - unë, Deljan Peevski, do t'i ndaloj".