Festat po afrojnë dhe ofertat e Krishtlindjeve dhe Vitit të Ri po kërkohen gjithnjë e më shumë. Rezervimet filluan që nga shtatori dhe tani është pothuajse e pamundur për të gjetur vende të lira në destinacionet tona më të njohura, njoftojnë hotelierët dhe restorantet. Arsyeja - bullgari mësoi që herët të planifikojë pushimet e tij. Këtë vit paketat e pushimeve, në varësi të kategorisë së hotelit dhe shërbimeve të përfshira, variojnë nga 80 deri në 500 leva në mbrëmje. Por ka oferta për 15 000 leva për të pritur Vitin e Ri në Bullgari, të cilat tashmë janë shitur.

"Ndërmjet 20 dhjetorit dhe 2 janarit - periudha e festave, ne presim rreth 720 000 udhëtime të bullgarëve brenda dhe jashtë vendit", tha për Radio Bullgarinë Konstantin Zankov, një ekspert i turizmit. Ai përshkroi një tendencë interesante:

“Këtë vit shohim një interes të shtuar për Krishtlindjet, gjë që vetëm mund të na bëjë të lumtur. Sepse në vitet e mëparshme, disi gjatë Krishtlindjeve, bullgarët nuk udhëtonin shumë, por preferonin ta planifikonin festën e Lindjes së Krishtit si festë familjare. Por sivjet, ndoshta për shkak të kombinimit të ditëve festive, ndaj paketave të Krishtlindjeve u shfaq interes të madh dhe u shitën shumë shpejt në hotelet e mira. Ka pasur edhe regjistrime të hershme shumë aktive për Vitin e Ri.”

Ofertat për pushimoret spa gëzojnë përqindjen më të lartë të rezervimeve të hershme dhe tashmë u shitën. Por hiti i këtij viti janë bujtinat, mësojmë nga Konstantin Zankov:

“Fillimisht mbushen bujtinat, pastaj edhe vendpushimet dimërore – si ato më të mëdhatë, si Bansko dhe Borovec, dhe ato më të voglat si Maljovica, që po tërheqin interes të madh këtë dimër. Miqtë shfrytëzojnë pushimet për të praktikuar sportet e tyre të preferuara dimërore, ndërsa ata që preferojnë shëtitjet në mal shijojnë një përrallë dimërore. Ka edhe interes të madh për qytetet tona, si dhe për hotelet e pakta përgjatë bregut të Detit të Zi me programe atraktive pushimesh të kombinuara me një spa”, thotë Zankov.

• Bujtinat buzë liqenit, vendpushimet spa dhe fshatrat etnografikë janë hit gjatë pushimeve

Dhe një trend tjetër – gjithnjë e më shpesh ne zgjedhim të festojmë Krishtlindjet dhe Vitin e Ri larg shtëpisë. Rreth 100 mijë qytetarë tanë po përgatiten për të kaluar pushimet jashtë vendit.

• Mbi 100 mijë bullgarë do të udhëtojnë jashtë vendit gjatë festave të ardhshme

Më të njohurat janë udhëtimet në vendet fqinje të Ballkanit - Serbi, Greqi, Turqi. Pas tyre në preferencat e bullgarit janë kryeqytetet evropiane, në të cilat ka linja ajrore të rregullta me kosto të ulët dhe, natyrisht, pushimet charter në qoshet më të ngrohta të planetit, ku planifikimi dhe prenotimet fillojnë që në verë:

"Destinacionet ekzotike me buxhet të ulët janë Egjipti, Dubai, si dhe Tunizia, edhe pse tani është e freskët atje - thotë Konstantin Zankov. - Por Dubai është një destinacion tradicional për Krishtlindjet dhe Vitin e Ri. Për të, për shembull, ka paketa që fillojnë nga rreth 1000 leva duke arritur në 3-4 mijë leva për person. Por kur flasim për ekzotiken e vërtetë, duhet të përmendim udhëtimet e pushimeve në destinacione të largëta si Sejshellet, Maldivet, Mauritius, Republika Dominikane apo edhe udhëtimet vajtje-ardhje në Vietnam, Kamboxhia etj. Dhe sigurisht, lundrimet me anije! Ky është një trend që po zhvillohet shumë në vendin tonë vitet e fundit”.

Pritshmëritë janë që festat e dhjetorit të shënojnë fillimin e një sezoni të suksesshëm dimëror me një rritje prej 5%, njoftoi ministria jonë e turizmit. Dhe bora na befasoi këndshëm në nëntor, falë të cilit vendpushimet tona të skive hapën sezonin më herët se zakonisht - në fillim të dhjetorit.

Përgatiti në shqip dhe publikoi: Svetllana Dimitrova

Foto: Pexels, Festa Winter Palace, Pixabay