"Ja ku jemi përsëri në Sofje për Erasmus! Kësaj radhe tema është pak më e komplikuar. Një tjetër aventurë na pret," ndau në Facebook disa ditë më parë Veneta Nenkova, themeluesja e shkollës bullgare në Romë. Faza e parë e projektit mblodhi së bashku bullgarë nga Italia dhe Bullgaria, të cilët punuan në Gjimnazin e Parë të Gjuhës Angleze në Sofje javën e kaluar. Ndërsa sfidat me të cilat u përballën ishin si në fushën e kërkimit, ashtu edhe në njohjen dhe gjetjen e rrugës drejt njëri-tjetrit në mënyrë që të punonin në mënyrë sa më efektive si ekip.

Maja Padeshka - drejtoreshë e shkollës në Romë dhe një nga drejtueset e projektit – tregon:

"Në ditën e parë, fëmijët nga secili vend formuan grupe pune dhe ndanë njohuritë e tyre mbi temat. Ata krahasuan se si janë gjërat në Bullgari, Itali dhe Danimarkë përsa i përket mbrojtjes së ujit të pijshëm, burimeve të energjisë, ligjeve dhe politikave të vendeve për mbrojtjen e mjedisit. Ata punojnë në grupe dhe me kompjutera, kërkojnë informacion mbi problemin dhe më pas e prezantojnë atë në formën e rezultateve konkrete. Shohim se si këta të rinj po njihen gjithnjë e më shumë me njëri-tjetrin dhe po fillojnë të mendojnë në një drejtim të përbashkët. Këto projekte janë jashtëzakonisht të rëndësishme dhe nxisin të menduarit së bashku në Evropë dhe që fëmijët të kenë një ndërgjegje dhe qëllim të përbashkët. Sepse brezi i ri ka detyrën e vështirë për të zgjidhur disa probleme të vështira."

Për të mësuar rreth energjisë bërthamore, nxënësit ndoqën një leksion në Fakultetin e Fizikës të Universitetit të Sofjes "Shën Kliment Ohridski", që u ndihmoi në një nga detyrat lidhur me analizimin e qëndrimeve dhe ndërgjegjësimin e publikut në lidhje me inovacionet dhe veprimet e duhura gjatë fatkeqësive natyrore. Amira Kaçarova, një nxënëse nga shkolla e Romës, ndan:

"Unë dhe grupi im vendosëm të flasim për tërmetet duke intervistuar njerëz në Sofje. Të rinjtë që intervistuam thanë se nuk kishin përjetuar një të tillë, por ishte ndryshe kur pyetëm të moshuarit. Ata e dinin se si ndihej një person në një situatë të tillë. Na interesonte ana psikologjike dhe si e përjetojnë njerëzit tërmetin."

Xhulia Neti – gjithashtu nga Roma, shton:

"Tema e grupit tim ishte turbinat e erës. Unë u mahnita nga fakti se shumica e njerëzve nuk ia kishin idenë dhe nuk ishin të informuar mirë rreth temës."

Shoqja e saj e klasës në shkollën bullgare të së dielës në Romë, Joana Kostova, është e bindur se duhet të flasim dhe të marrim masa për të trajtuar problemet mjedisore, përndryshe e ardhmja me siguri nuk do të jetë e bukur. Xhulia Neti ndan vëzhgimet e saj personale se ndryshimi i stinëve është i dukshëm, ndërsa Amira Kaçarova është e bindur se ndotja e mjedisit mund të kontrollohet duke përdorur produkte të riciklueshme. Dhe jep një shembull të ndryshimeve në natyrë që ka dëshmuar personalisht:

"Çdo vit shkoj për plazh në Turqi dhe vërej se uji po bëhet më i ndotur dhe në Pamukkale gradualisht po zhduket uji. Kjo më trishton shumë, sepse fëmijët në të ardhmen nuk do të mund ta shohin bukurinë e botës siç e shohim ne tani."

Dhe duke diskutuar për temat e mbrojtjes së mjedisit dhe ruajtjen e ekuilibrit në natyrë, të rinjtë bullgarë mësuan edhe një mësim tjetër - se kilometrat nuk përcaktojnë afërsinë mes njerëzve. Alesandro Masaçi, i cili aktualisht po ndihmon me projektin, ish-nxënës i shkollës në Romë dhe aktor i diplomuar, thotë se puna krijon marrëdhënie miqësore:

"Ne vazhdojmë të mbajmë kontakte me njerëzit nga projekti i mëparshëm 6 vite më parë, i shkruajmë dhe telefonojmë njëri-tjetrit, ndajmë ide. Këto projekte janë shumë të dobishme. Jemi bashkë pothuajse gjithë ditën. Jemi të rrethuar nga një energji e bukur që mbetet në vitet në vijim."

Ndërsa Elica Pavllova nga Gjimnazi i Parë i Gjuhës Angleze tregoi se si mblidhen pas pune, flasin për përshtypjet e ditës, por edhe për jetën në Itali dhe Bullgari. “Komunikimi me ta është jashtëzakonisht interesant”, ndan nxënësja nga Sofia dhe vijon me përshtypjet e saj nga komunikimi me bashkëmoshatarët nga Roma:

"Ne gjejmë shumë gjëra të përbashkëta. I pyetëm se cilat janë ushqimet e tyre të preferuara bullgare - ata e duan kosin dhe bëjnë petulla me djathë për mëngjes. Ata e ruajnë frymën bullgare brenda vetes dhe është shumë interesante të shohësh që edhe ata jashtë vendit jetojnë si ne dhe pëlqejnë të njëjtat gjëra."