Debati ekonomik dhe financiar sa i përket konkurrueshmërisë së Evropës është kyç për Parlamentin Evropian, mësojmë nga një intervistë e të dërguarës speciale të Radios Kombëtare Bullgare në Strasburg, Irina Nedeva, me eurodeputetin bullgar nga Partia Popullore Evropiane, Andrej Kovaçev, i cili është anëtar i Komitetit të Punëve të Jashtme të PE-së, dhe me Ivajllo Vëllçev, një eurodeputet nga Grupi i Konservatorëve dhe Reformistëve Evropianë.

"Tema mbetet e njëjtë. Ajo është se si ta bëjmë ekonominë evropiane efikase dhe konkurruese pikërisht për shkak të sfidave që na presin me administratën e re në SHBA - si të jemi më të shpejtë, më fleksibël, me më pak burokraci, më pak administratë, të mbështesim bizneset e vogla dhe të mesme, inovacionin, inteligjencën artificiale - ndan Andrej Kovaçev. - Pyetja më e madhe është si - me cilat akte legjislative në nivel kombëtar dhe evropian - mund të thjeshtojmë shumë rregullore, të zvogëlojmë raportimin që industria është e detyruar të bëjë, gjë që kërkon një kohë jashtëzakonisht të gjatë, largon konkurrueshmërinë e BE-së dhe i bën më pak tërheqëse investimet vendase dhe të huaja në BE.

Në një përpjekje për të rikthyer trendin e rënies industriale dhe për të rritur përpjekjet për të reduktuar burokracinë dhe kostot e energjisë, si dhe aftësinë e tij për të konkurruar me Shtetet e Bashkuara dhe Kinën në fusha të reja si inteligjenca artificiale, Komisioni Evropian prezantoi në fund të janarit iniciativën e tij të parë të madhe të mandatit të ri të menaxhimit, të quajtur Competitive Compass.

Eurodeputeti Ivajllo Vëllçev, për të cilin ky është mandati i tij i parë në Parlamentin Evropian, beson se Evropa po përpiqet të riparojë dëmin që ka shkaktuar vetë.

"Nuk ka asnjë temë në Parlamentin Evropian që nuk lidhet me rikthimin e konkurrueshmërisë së Evropës. Rezulton se duke i kushtuar vëmendje teknologjive të reja, teknologjive të gjelbra dhe faktit që të gjithë të kenë nga 60 diploma të arsimit të lartë, në një moment Evropa mbetet pa përpunues metalesh, pa saldatorë ose njerëz për të riparuar tualetin, të cilin padyshim që inteligjenca artificiale nuk do ta zhbllokojë kur është e nevojshme," komentoi eurodeputeti.

Ursula von der Leyen premtoi të zvogëlojë barrën administrative në përpjekje për të ndaluar rrjedhjen e talenteve nga Evropa drejt SHBA-së, Singaporit dhe destinacione të tjera, veçanërisht në sektorin e IT dhe AI, kujtoi Andrej Kovaçev dhe vuri në dukje:

"Ne kemi shumë për të bërë. Ne nuk jemi aspak në një pozicion të lakmueshëm. Duhet të punojmë në dy nivele - si në nivel evropian me thjeshtimin e të gjitha procedurave, me reduktimin e raportimit, i cili është i detyrueshëm, por paralelisht me këtë në çdo vend anëtar, i njëjti legjislacion për të reduktuar administratën dhe burokracinë duhet të miratohet nga parlamentet kombëtare. Përndryshe, nuk do të mund të përmirësojmë klimën e investimeve. Për ne është shumë e rëndësishme që klima e investimeve në Bullgari të përmirësohet në mënyrë drastike me një perspektivë të qartë dhe të qëndrueshme."

Sipas Andrej Kovaçev, bisedimet intensive janë duke u zhvilluar për të shmangur një luftë tregtare me Shtetet e Bashkuara. Është në interesin e të dy vendeve - SHBA-së dhe BE-së - të kemi marrëdhënie të mira me partnerin tonë tradicional SHBA-në, pasi tregtia e lirë është një mjet themelor për prosperitetin e të gjithëve, shprehet në mënyrë kategorike eurodeputeti bullgar.

Kolegu i tij Ivajllo Vëllçev është i mendimit se Evropa nuk duhet të shpëtojë veten individualisht në mjedisin ndërkombëtar që është duke ndryshuar në mënyrë dinamike:

"Nuk do të jetë për të mirën e Bashkimit nëse secili vend fillon të kërkojë shpëtimin e tij, pa parë se çfarë po ndodh rreth tij. Gjëja e rëndësishme është të rimendohen politikat aktuale evropiane - në mënyrë që Evropa të mos kryejë vetëvrasje ekonomike dhe çfarëdo që të bëjë, ta bëjë në unitet."

Intervista: Irina Nedeva

Përgatiti në shqip dhe publikoi: Kostandina Bello