Në arsimin bullgar, inteligjenca artificiale është e pranishme prej gati katër vitesh – thotë Borisllav Mihajllov, ekspert arsimor në qendrën mësimore "Kreativitet" dhe pedagog në Universitetin e Plovdivit "Paisij Hilendarski". Sipas tij, fëmijët e përdorin më së shumti për të mësuar dhe ndonjëherë për të "mashtruar" me detyrat e shtëpisë dhe esetë, ndërsa mësuesit – për të përgatitur mësimet. "Një moment interesant është se mund të përfshijmë të dhëna për nxënësit dhe të krijojmë materiale të personalizuara që i përshtaten kërkesave, nivelit dhe nevojave të tyre", shton specialisti i AI-së.

Qendra mësimore po zhvillon sistemet e saj me ndihmën e ChatGPT, si dhe modeleve të inteligjencës artificiale të destinuara për arsimin në vend.

"Kemi një model – asistent kreativ për kopshtet e fëmijëve, i cili krijon përralla, tregime, këngë dhe i përshtat ato për secilin fëmijë," – tregon Boris Mihajllov. "Në bazë të këtyre modeleve, mund të krijojmë përralla shumë më të ndryshme nga ato tradicionalet dhe t’i përdorim për të zhvilluar cilësi të ndryshme te fëmijët, në mënyrë që ata të fantazojnë në një drejtim të caktuar dhe të ndryshojnë konceptet standarde."

Modele të ngjashme janë krijuar edhe për arsimin fillor dhe për nxënësit më të mëdhenj. Ato janë trajnuar të ndihmojnë në lëndë si gjuha dhe letërsia bullgare, historia, ekonomia, sipërmarrja dhe disiplina të tjera më të specializuara. Të gjitha këto modele janë falas dhe të aksesueshme përmes ChatGPT ose link në faqen e internetit të "Kreativitet".

"Shkollat e ndryshme pedagogjike e shohin zhvillimin e disiplinës në drejtime të ndryshme, ndërsa ne vetë arrijmë në përfundimin se sistemi aktual i mësimdhënies në klasë nuk është efektiv për brezat që janë rritur me botën dixhitale," – thotë Boris Mihajllov."Për këtë arsye, brenda disa vitesh, gjithnjë e më shumë do të flitet për të ashtuquajturën mësimdhënie kontekstuale, e cila po hyn në arsim nëpërmjet inteligjencës artificiale. Përmes saj – me ndihmën e qasjeve ndërdisiplinore, mund të krijojmë situata reale, ku fëmijët të ndihen si në jetën e vërtetë dhe të zgjidhin probleme në kontekstin e asaj që mësojnë. Bullgaria është një nga pionierët që ka filluar të zbatojë këtë model arsimor."

Ashtu si çdo gjë në jetën tonë, edhe inteligjenca artificiale ka dy anë. Për çfarë duhet të jenë të kujdesshëm ata që e përdorin atë në fushën e arsimit?

“Rreziku i parë është zvogëlimi i mendimit kritik, pasi shumë shpesh gjërat që përdorim nga inteligjenca artificiale merren si të vërteta absolute,” thotë Boris Mihajllov. “Fëmijët, duke komunikuar me inteligjencën artificiale, shpesh mendojnë se përballë tyre qëndron një njeri. Dhe e treta është se ata fillojnë të krijojnë lidhje me AI-në. Pra, është shumë e rëndësishme që t’i kushtohet më shumë vëmendje psikologjisë dixhitale, që të mund të kenë një ide të qartë se nuk po komunikojnë me një njeri të vërtetë, pavarësisht se sa i afërt dhe i këndshëm mund t’iu duket.”

Megjithatë kush duhet të ndërhyjë, që fëmijët të ruajnë aftësinë e tyre për mendim kritik dhe krijimtari? “Do të doja shumë të thosha “mësuesit,” por në fakt roli kryesor është i shoqërisë, i gazetarëve, i gjithë sistemit dhe më së shumti i prindërve,” është përgjigjja e shkurtër e Boris Mihajllov.

“Duhet të theksojmë diçka të rëndësishme,” vazhdon eksperti, duke komentuar faktin që nxënësit shpesh i bëjnë detyrat e shtëpisë me ndihmën e inteligjencës artificiale. “Fëmijët tanë janë nga gjeneratat 'Alfa' dhe Z, ata kanë lindur me teknologjinë, për ta kjo nuk është thjesht një mjet, por një mënyrë jetese. Dhe këtu pyetja është: 'Nëse një makineri e bën mirë diçka, a nuk duhet ta mësojmë fëmijën ta përdorë atë, në vend që ta ndalojmë përdorimin e saj?' Problemi është se si t’i përfshijmë teknologjitë e reja në procesin arsimor."

Foto:cpocreativity.com

Përgatiti në shqip dhe publikoi: Kostandina Bello