“Ritmi i Ballkanit” – një takim unik i traditave në një projekt të Orkestrës së Muzikës Popullore të Radios Kombëtare Bullgare (BNR)

botuar më 25-04-06 8.30.PD

Foto: OMP-BNR

Tamburica serbe, cimbal rumun, lira e Kretës dhe gajda bullgare do të tingëllojnë në edicionin e dhjetë të projektit më të suksesshëm të Orkestrës së Muzikës Popullore të BNR-së – “Ritmi i Ballkanit”. Takimi i radhës me publikun dhe muzikantët nën drejtimin e dirigjentit Dimitër Hristov do të mbahet më 10 prill (e enjte, në orën 19:00) në Studion e Parë të Radios Kombëtare Bullgare.

Gjatë viteve, “Ritmi i Ballkanit” është shndërruar në një takim unik të traditave, ritmeve dhe emocioneve të muzikës ballkanike. Edicioni i ri i projektit do të prezantojë katër muzikantë të jashtëzakonshëm: virtuozin e tamburicës serbe Branko Bako Jovanoviç, mjeshtrin e cimbalit rumun Anatol Kazanoj, zërin e butë të lirës së Kretës Keli Toma dhe tingullin emocionues të gajdes bullgare në duart e Petjo Kostadinovit. Këta janë artistë që, me mjeshtërinë e tyre të lartë në instrumentet që luajnë dhe me karrierat e tyre të shquara ndërkombëtare, janë bërë ambasadorë të muzikës tradicionale të Ballkanit në të gjithë botën.

Petjo Kostadinov, Branko Bako Jovanoviç, Anatol Kazanoj dhe Keli Toma

“Ritmi i Ballkanit” nuk është thjesht një seri koncertesh, por një projekt i tërë, i cili me kalimin e viteve është shndërruar në një ngjarje të rëndësishme në jetën muzikore të Bullgarisë. Ky format ndërkombëtar i Orkestrës së Muzikës Popullore dëshmon çdo vit se Ballkani mund të tingëllojë në harmoni, dhe se muzika bashkon kultura dhe ndërton ura mes popujve.

Mund të bindeni vetë për këtë – biletat për koncertin mund të blihen në Qendrën e Informimit dhe Reklamës të BNR-së dhe në rrjetin e Eventim.

Përpiloi: Elena Karkallanova

Foto: OMP - BNR, Ani Petrova, Facebook / Orkestra e Muzikës Popullore të BNR-së (fotograf: Stephan Talneau)

Përgatiti në shqip dhe publikoi: Kostandina Bello

Последвайте ни и в Google News Showcase, за да научите най-важното от деня!

Ndaje

“Ritmi i Ballkanit” – një takim unik i traditave në një projekt të Orkestrës së Muzikës Popullore të Radios Kombëtare Bullgare (BNR)

Më shumë nga rubrika

"Strati i thoshte Angelakit"

Bansko është përsëri kryeqyteti i xhazit i Bullgarisë – për 10 ditë në kulmin e verës

"Е tashmja ime" – një fotografi e tatuazhuar në zemër