Një nga krijuesit bullgarë më të spikatur, më të talentuar dhe më aktivë me emrin Georgi është dirigjenti, kompozitori dhe gajdexhiu virtuoz Georgi Andreev. 

U takuam me Georgi Andreevin në prag të festës së madhe të krishterë të Shën Gjergjit Fitimtar dhe për pyetjen e parë – pse quhet Georgi – përgjigjja është më se e pritshme sipas traditave tona familjare: "Epo, sepse jam pagëzuar me emrin e gjyshit tim, dritë pastë – gjyshit tim Georgi nga ana e babait". Për paraardhësit e tij ai rrëfen: 

"Do të filloj me këtë, se të gjithë në fisin tim, që kur i mbaj mend, kanë qenë më pak ose më shumë muzikorë. Janë marrë me muzikë, sigurisht jo në mënyrë profesionale. Unë jam i vetmi muzikant profesionist. Por muzika gjithmonë ka qenë e pranishme. Fisi i babait tim e ka origjinën nga një fshat trak. Quhet Bukovo dhe ndodhet në këmbët e Rodopëve Lindorë. 

Kanë qenë të njohur për faktin që kishin damar hajdutësh. Ndërsa nga ana e nënës, fisi im vjen nga fshatra që gjithashtu janë në qarkun e Haskovos, por janë pak më afër lumit Marica – midis Dimitrovgradit dhe Simeonovgradit, rreth Radnevos, fshatrat Trojan, Svirkovo. Kështu që në përgjithësi, rrënjët e mia janë trakase." 

Kujtimet e para të tij nga Dita e Shën Gjergjit janë për mot të mirë – në fëmijërinë e tij Dita e Shën Gjergjit gjithmonë ka qenë me diell. Me shaka pranon se nuk është adhurues i mishit të qengjit dhe nuk ndjen ndonjë nevojë të veçantë për ta festuar festën me qengj të pjekur, sipas zakonit. Për të, Dita e Shën Gjergjit lidhet edhe me faktin se në vitet e shkollës kishte traditë që ata që mbanin emrin e Shën Gjergjit të lahen te burimi. "Madje me zor – kujton Georgi Andreev – të kapnin dhe të fusnin kokën nën rubinet". Nuk ka qenë dëshmitar i ritualeve folklorike për Ditën e Shën Gjergjit, nuk ka as kujtime të veçanta muzikore për këtë festë. "Kur isha i vogël, në shtëpi më së shpeshti dëgjohej muzikë popullore bullgare, kështu që fëmijëria ime lidhet kryesisht me këngët e gjyshes sime, e cila këndonte vazhdimisht. Ajo këndonte ditë e natë – për çdo rast dhe pa rast, duke kryer çdo lloj pune ajo këndonte." 

Përmendim netët yjore nga fillimi i vitit në Sofje dhe në Varna: Georgi Andreev, Nigel Kennedy dhe Filarmonia e Vracës. "Nigel – me të njihemi që nga viti 2016. Më pëlqen të punoj me të, është shumë kënaqësi." 

Përveç me Nigel Kennedy, Georgi prej dekadash përshkon botën me projekte të ndryshme krijuese. Një muaj më parë, Ansambli Kombëtar Folklorik "Filip Kutev" prezantoi në sallën 1 të Pallatit Kombëtar të Kulturës shfaqjen e famshme prej vitesh "Luleshtrydhe të egra". E pyes, si ka lindur ideja për një projekt, i cili të përfshijë jo vetëm muzikë bullgare, por edhe muzikën e etnive që jetojnë në territorin tonë: myslimanë, karakaçanë, vllehë, gagauzë, hebrenj, armenë... Një pasuri e madhe e traditave folklorike, të bashkuara në një. 

"Kjo ide lindi në vitin 2003 në bashkëpunim me mikun dhe kolegun tim – koreografin Ivajllo Ivanov. Vendosëm të bënim një shfaqje, e cila t’i kushtonte vëmendje dhe të theksonte pikërisht këto folklore, që deri atëherë ishin lënë pas dore, të neglizhuara dhe pothuajse një 'temë tabu', folklore që ekzistojnë dhe jetojnë në territor. Jashtëzakonisht interesante, autentike, origjinale dhe meritojnë të nxirren në dritë. Dhe më së shumti nga ansamblet. Mendoj se si ansambli i parë, më i madhi dhe në përgjithësi udhëheqësi në vend, Ansamblit Kombëtar Folklorik "Filip Kutev" i shkonte të ndërmerrte një hap të tillë të rrezikshëm, sepse kjo në vetvete ishte një hap i rrezikshëm. Siç e dimë, ky zhanër karakterizohet me një konservatorizëm të veçantë dhe jo të gjithë ishin 'të magjepsur'... Por në pjesën më të madhe u prit ngrohtësisht dhe shumë pozitivisht nga njerëzit që mendojnë më përparuar në këtë fushë. Sigurisht, ne vazhdojmë ta interpretojmë me shumë sukses, madje këtë vit në praktikë është plotësisht nën shenjën e koncert-shfaqjes 'Luleshtrydhe të egra', me të cilën kemi një turne kombëtar." 

Ansambli mban edhe shumë projekte të tjera: "Burimet", "Klasikë Folklorike", "Eja të valëzojmë, të përkulemi"... Një titull krejtësisht të ri ende nuk ka, por çdo i tillë kërkon përgatitje të gjatë dhe serioze – krijim dhe proces provash, veçanërisht në një përbërje që vetë e krijon repertorin e vet. Georgi Andreev është aq i zënë saqë nuk mund të rendisë përmendësh angazhimet e tij për muajt e ardhshëm: një numër i madh koncertesh me përbërje të ndryshme. Ja kujtova një intervistë nga viti 2013, kur në pyetjen nëse do t'i drejtojë vajzat e tij drejt jashtë vendit, ishte përgjigjur: "Me siguri po!" dhe kishte shpjeguar se klima kulturore në Bullgari gjithnjë e më shumë po shkonte drejt vendosjes së një "epoke akulli". Çfarë do të thoshte sot? Të dyja vajzat e tij janë këtu! 

"Atëherë kështu kam menduar. Tani gjërat nuk janë më saktësisht në atë mënyrë, shumë gjëra kanë ndryshuar. Fëmijët e mi janë këtu, në Bullgari. Unë nuk mund t’i dëboj... Pasi ato janë të lumtura dhe kanë gjetur realizimin këtu, nuk ka gjë më të mirë se kjo. Sa i përket klimës kulturore në Bullgari – ajo gjithmonë ka qenë në kufirin e mbijetesës.  Ajo që do të dëshiroja është një dozë më e madhe e shëndetshme e krenarisë kombëtare, e cila në fakt do të çonte në një ngritje – edhe kulturore. Me fjalë të tjera, ta them edhe më drejtpërdrejt – të ulim pak adhurimin ndaj të huajës. Po shprehem shumë butë." 

Me nostalgji kujtoj shfaqjen e tij të mrekullueshme "Dy botë", të krijuar së bashku me Neshka Robevën para një çerek shekulli. Kishte dy personazhe kryesorë – Dragoi dhe Jana, dhe Dragoi ishte jashtëzakonisht simpatik dhe shpirtërisht i lartësuar... Nga një këndvështrim tjetër – çdo njeri që mban emrin Georgi, me siguri ka dragoin e tij, me të cilin lufton (ndonjëherë luftëra të ashpra) dhe të cilin duhet ta mposhtë. Kush është Dragoi i Georgi Andreev-it, si lufton ai me të dhe a arrin ta mposhtë? 

"Çdo ditë luftoj me Dragoin tim, i cili merr forma dhe mishërime të ndryshme, sepse ai është brenda meje. Çdo njeri e ka përbindëshin e tij... me të cilin çdo ditë bën beteja – herë fiton, herë jo... të shpresojmë që gjithnjë e më shpesh." 

Lexoni më tepër nga arkivi i Radio Bullgarisë: