Shtyrja e tregut të lirë të energjisë elektrike për familjet – cilat do të jenë efektet për bullgarët?

botuar më 25-05-14 7.00.PD

Foto: pixabay

Liberalizimi i tregut të energjisë elektrike për konsumatorët familjarë, pra mundësia për të hyrë në shkëmbimin e lirë të energjisë elektrike, në të cilin ndërmarrjet kanë marrë pjesë prej vitesh, po shtyhet. Të paktën për tani.

Reforma duhej të hynte në fuqi më 1 korrik të këtij viti, pas një shtyrjeje fillestare prej 365 ditësh nga ana e deputetëve gjatë vitit të kaluar 2024. Në fund, të paktën në leximin e parë, Kuvendi Popullor pranoi: liberalizimi i energjisë elektrike për familjet po shtyhet, por ende nuk është e qartë deri kur.

Propozimet mbi këtë çështje ishin tre – dy nga partitë në pushtet dhe një nga opozita. BSP propozoi që periudha e shtyrjes të jetë 2 vjet, "Ka një popull të tillë" dëshiron që ajo të jetë 5-vjeçare, ndërsa "Rilindja", propozimi i së cilës u refuzua, dëshironte që çmimet të mbeten të fiksuara edhe për një dekadë përpara. Në fund, para leximit të dytë të ndryshimeve ligjore, do të kërkohet një variant kompromisi midis dy propozimeve të para.

Arsyeja kryesore për këto lëvizje politike është opinioni publik mbizotërues kundër liberalizimit dhe frikërat e shumë ekspertëve se ajo mund të çojë në një rritje të mprehtë të çmimeve të energjisë elektrike. Nga ana tjetër, ajo është një kusht për Bullgarinë për të marrë financim nga Plani për Rimëkëmbje dhe Qëndrueshmëri dhe vendi ynë ka marrë një angazhim ndaj Komisionit Evropian për të futur tregun e lirë për familjet. Pra, kjo është një parakusht për sanksione nga Brukseli.

Cilat do të jenë pasojat e vendimit të përfaqësuesve të popullit? Pyetëm ekspertin e energjisë, kryetarin e Forumit Bullgar të Energjisë dhe Minierave dhe ish-deputetin Ivan Hinovski.

"Për shkallën e gatishmërisë së energjetikës sonë dhe sistemit, ky është një hap që mbron nga një rritje e shpejtë e çmimeve për familjet. Sepse, megjithëse çmimet në bursat në Evropë po bien dhe janë të qëndrueshme, kjo pashmangshëm do të shkaktojë një rritje të çmimeve me 10-15%. Është një hap në drejtimin e duhur, 1 ose 2 vjet nuk janë fatale, por kjo është një shenjë negative ndaj Evropës", theksoi eksperti.

Me një qasje të mirë nga ana e qeverisë bullgare dhe një arsyetim të mirë përse po shtyhet kalimi në tregun e lirë, sanksionet nga Brukseli mund të na shmangen, mendon Ivan Hinovski.

"Varet në masë të madhe nga mënyra se si do të arsyetohet. Nëse kjo përdoret si argument – Bullgaria është në një proces kalimtar të investimeve shumë të rënda – Centrali hidroakumulues me pompim "Çaira", centrale të tjera hidroakumuluese me pompim, ndërtimi i fotovoltaikëve, centrale të reja bërthamore… Komisioni Evropian do ta kuptonte. Megjithatë, nuk përjashtohet që të na hapet edhe një procedurë ndëshkuese."

Në fund, kalimi në tregun e lirë është një hap pozitiv, është i bindur eksperti i energjisë dhe shton: "Para kësaj, megjithatë, është e nevojshme një fushatë masive informuese për popullatën për mënyrën se si të përdorë në mënyrë optimale përparësitë që ai ka. Por më e rëndësishmja – të krijohet një mekanizëm për të kompensuar familjet në nevojë nga energjia".

Shumica e njerëzve, konstatojmë me një sondazh të improvizuar, nuk janë veçanërisht të njohur me çështjen.

Takojmë edhe Anton Naçev, 30 vjeç, por tashmë doktor në shkencat politike nga Universiteti i Sofjes. I riu nuk shqetësohet nga një rritje e mundshme e çmimeve të energjisë elektrike.

"Hipotetikisht kjo do të ishte e mundur, nuk mendoj se ajo që do të arrijë te konsumatorët përfundimtarë do të ndjehet prej tyre si një rritje e mprehtë e çmimeve. Dhe në fund të fundit, mund të shihni statistikat nga Eurostat dhe Komisioni Evropian, sipas të cilave të ardhurat e njerëzve, pak a shumë, po rriten në bazë të përgjithshme", është optimist Anton.

Në fund të fundit – po, me të vërtetë është e nevojshme një fushatë informuese për çështjen nga ana e shtetit, siç tregoi edhe sondazhi ynë modest. Nevojitet edhe vullnet politik. Dhe çfarë do të vendosin përfundimisht deputetët – as ata për momentin nuk janë të qartë. Në periudhën dyjavore para se projektligji të hyjë në leximin e dytë, duhet të sqarohen momentet kyçe – si për çfarë periudhë do të shtyhet liberalizimi, ashtu edhe mekanizmi për përcaktimin e nevojës energjetike. Parashikohet që tashmë jo drejtpërdrejt KRRE, por Këshilli i Ministrave pas një raporti nga rregullatori i energjisë të përcaktojë çmimet përfundimtare.

Fotografi: Pixabay, BGNES, BTA

Përgatiti në shqip: Kostandina Bello

Последвайте ни и в Google News Showcase, за да научите най-важното от деня!

Ndaje

Shtyrja e tregut të lirë të energjisë elektrike për familjet – cilat do të jenë efektet për bullgarët?

Më shumë nga rubrika

Çmimet e pronave në bregdetin tonë vazhdojnë të rriten, por më ngadalë

62% e bullgarëve që punojnë dhe janë të siguruar kanë të ardhura nën minimumin jetik

Të ardhurat e familjeve bullgare në vitin 2024 kanë tejkaluar shpenzimet

Zheço Stankov: Duhet të paguajmë mbi 4 miliardë leva për të ndërprerë kontratën me “Botash”

Shpenzimet u rritën me 13% dhe të ardhurat me 15% për tremujorin

Industria e turizmit pret një sezon veror të frytshëm dhe është gati për euron