Nuk është thjesht një bujtinë, por një përvojë interaktive - turizmi rural tek ne është në zhvillim e sipër

botuar më 25-05-22 8.00.MD

Foto: bgvakancia.com

Platformat për rezervim të hoteleve dhe ekskursioneve në Bullgari raportojnë interes të lartë si ndaj resorteve tona tradicionale bregdetare dhe spa, ashtu edhe ndaj pushimeve në bujtinat në fshat. Në prag të sezonit aktiv veror, zgjedhja e bullgarëve bie kryesisht mbi pushime në mal ose në fshat. Rritja prej 10-15% e çmimeve në vendet e akomodimit krahasuar me vitin e kaluar nuk ndikon në kërkesën, mësojmë nga Milena Vusheva, menaxhere klientësh në platformën më të madhe për pushime në det, mal dhe fshat te ne.

Një natë në një shtëpi për mysafirë të klasit të mesëm kushton ndërmjet 30–90 leva (15-45 euro) për person. Gjithnjë e më shumë bullgarë zgjedhin vila dhe shtëpi të pavarura, të cilat jepen me qira për një ose dy familje, ose grup miqsh. “Tek ne oferta më e shtrenjtë është një shtëpi për 8 veta për 800 leva (400 euro) për natë në Dobrinishte,” thotë Milena Vusheva dhe shton se shumë objekte ofrojnë zbritje të mira për rezervime të hershme, gjë që ka motivuar njerëzit të organizojnë pushimet e tyre që në muajt e dimrit:

"Rezervimet e hershme u aktivizuan nga vetë hotelet dhe bujtinat, që në janar, shkurt dhe mars. Por rezervimet aktive ishin në prill dhe tani në maj – thotë Milena Vusheva. – Dhe guxoj të them se shumë nga vendet që ofrojnë zbritje, janë tashmë pothuajse të mbushura. Zbritjet fillojnë nga minus 10% deri në minus 30%, dhe në disa raste ka edhe anulim falas, një muaj më parë” – thotë Milena Vusheva.

Bujtinat buzë liqenit, vendpushimet spa dhe fshatrat etnografikë janë hit gjatë pushimeve

Bullgari po fillon të ndryshojë përfytyrimet tradicionale për pushim: verës – në det, dimrit – në mal. Gjithnjë e më shpesh njerëzit planifikojnë pushimet e tyre në stinët kalimtare – në pranverë dhe në vjeshtë. Veçanërisht aktivë janë familjet e reja me fëmijë të vegjël, të cilët janë të mirëpritur në bujtina. Turizmi rural te ne nuk është më vetëm një shtëpi komode për pushim – ai siguron përjetime interaktive. Në disa vende ofrohen programe të posaçme familjare.

"Bujtinat dhe hotelet tashmë ofrojnë shërbime si animacion javor për fëmijë. Ka paintball, “Master Chef” për fëmijë, kalërim dhe ecje malore – shpjegon Milena Vusheva. – Mund të gjeni edhe shtëpi për mysafirë që ofrojnë shërbim si kamp fëmijësh me koncept interesant dhe madje me mësim të gjuhëve të huaja. Vetë vendet e akomodimit po ndryshojnë. Shtëpia fshatare e ka ruajtur pamjen e saj të lashtë, por komoditetet që ofron janë shtuar – në oborr tashmë ka pishinë, kënde për fëmijë, fëmijët luajnë në trampolina, lëkundëse, rrëshqitëse… Përveç kësaj, njerëzit preferojnë që në paketë të përfshihet mëngjesi dhe darka dhe kjo me produkte bio nga bujqësia shtëpiake. Në disa shtëpi në fshat do t’ju ofrojnë të mblidhni vezët ose do t’ju tregojnë si bëhet kosi, djathi, kaçkavalli."

Ndryshon edhe modeli ynë i sjelljes gjatë pushimit. Në vend të shtrirjes në shezlong pranë pishinës dhe relaksit të plotë, po drejtohemi drejt përjetimeve aktive. Shpesh kërkohen vende me ngjarje interesante. Për shembull, një festival lakre ose proshute fshati shndërrohet në një rast të shkëlqyer për një ekskursion dy-ditor me qëndrim një natë në një bujtinë lokale. Pushimet në fundjavë do të jenë të preferuara edhe në muajt e ardhshëm.

Sipas Milena Vusheva, turistët kërkojnë vende për akomodim pranë pikave tërheqëse natyrore ose kulturore dhe ajo përmend disa nga më të njohurat ndër to:

"Destinacione si Shkëmbinjtë e Bellogradçikut, Ujëvarat e Krushunës në rajonin e Lloveçit, Zllatna Panega me shumë formacione karstike dhe shpella si Ledenika ose Shpella e Sëevës etj. Ka interes për ferma të strucave dhe kënde zoologjike me kafshë interesante pyjore dhe shtëpiake, përfshirë edhe për parkun e arinjve në Belicë! Njerëzit rezervojnë një natë pranë këtyre vendeve dhe ditën tjetër kthehen. Ndërsa turistët më të moshuar rezervojnë pushimet me qëllim rehabilitimi ose fizioterapie në resorte si Strellça, Pavell Banja, Sandanski, fshati Banja, Velingrad" – tha në përfundim Milena Vusheva.

Lexoni më shumë mbi temën në publikimet e Radio Bullgarisë:

Shtëpi bujtina si muze etnografikë – të çlodhesh në një mjedis autentik fshati buzë Danubit

Momçillovci ofron rehati rurale dhe prehje shpirtërore në zemër të malit Rodopa

Udhëto ngadalë, pusho aktivisht apo se si turizmi rural në vendin tonë hyri në një fazë të re

Përgatiti në shqip dhe publikoi: Sindi Nikollofski

Foto: bgvakancia.com, Facebook /Pushime në një fshat në malet Rodope, Elena Karkallanova

Последвайте ни и в Google News Showcase, за да научите най-важното от деня!

Ndaje

Nuk është thjesht një bujtinë, por një përvojë interaktive - turizmi rural tek ne është në zhvillim e sipër

Më shumë nga rubrika

Freski ngjyrash, shtëpi prej guri dhe histori nga e kaluara – një shëtitje në fshatin magjik Dolene

Sofja thyen rekordet në turizëm – çfarë i tërheq të huajt në kryeqytetin tonë?

Udhëtimet atraktive me trenat retro të Hekurudhave Shtetërore Bullgare janë një hit i padiskutueshëm turistik

Bullgaria është e dyta në BE për cilësinë e ujërave për larje