Ndërtimi i Korridorit Vertikal të Gazit është një simbol i partneritetit evropian, transferimit të teknologjisë dhe krijimit të kooperativave në ndërtimin e rrjeteve të tilla, tha Ministri i Energjisë Zheço Stankov gjatë inspektimit të ndërtimit të Korridorit Vertikal të Gazit. Kryeministri Rosen Zheljazkov, Drejtori Ekzekutiv i Bulgartransgaz Vlladimir Malinov, përfaqësues të gjashtë vendeve pjesëmarrëse në projekt mbërritën gjithashtu në zonën e fshatit Mikrevo, Komuna Strumjani.

Gati 40 km terren i pastruar, 15 km tuba të salduar - 3 km prej tyre tashmë nën tokë, janë rezultatet e arritura deri më tani në kuadrin e projektit, me gjatësi 49 km. Sipas Ministrit, kjo është më shumë se sa pritej.

"Inspektimi i ndërtimit të Korridorit Vertikal të Gazit tregon se vendet që janë partnerë dhe aleatë po krijojnë mundësi për të siguruar diversifikimin dhe transmetimin e gazit", tha Rosen Zheljazkov. Ai shtoi se projekti u jep vendeve të Evropës Qendrore dhe Juglindore shumë mundësi që shkojnë përtej kuptimit tradicional të sovranitetit, pavarësisë dhe konkurrencës.

Sipas Vlladimir Malinov, korridori i gazit është një simbol i solidaritetit që të gjitha vendet pjesëmarrëse tregojnë ndaj Moldavisë dhe Ukrainës me qëllim që t'u sigurojnë atyre një furnizim alternativ me gaz natyror të lëngshëm pas ndërprerjes së furnizimeve ruse. Informacioni është i BNR, BGNES dhe BTA.

Redaktoi: Diana Cankova

Përgatiti në shqip dhe publikoi: Vesella Mançeva

Foto: BTA