Vendet e lira të punës në këta sektorë janë mbi 59 mijë. Biznesi ndjen mungesë edhe për specialistë me arsim të lartë, me afro 60 000 vende të lira pune. Vazhdon nevoja për infermierë të kualifikuar, mjekë, inxhinierë dhe farmacistë, ka mungesë edhe për kuadro pedagogjikë dhe mësues. Punëdhënësit kërkojnë edhe personel të pakualifikuar, me mbi 50 mijë vende të lira pune sipas sektorëve. Sipas studimeve të Agjencisë, më shumë se 66% e firmave dhe kompanive që veprojnë në vend kanë nevojë për fuqi punëtore. Arsyeja kryesore për vështirësitë në punësimin e kuadrove të reja është mungesa e arsimit dhe kualifikimit mes atyre që kërkojnë punë.

Sipas të dhënave të Eurostat-it, tregu i punës po pëson transformime serioze. Shkaqet burojnë nga përparimi teknologjik, ndryshimet demografike dhe përpjekja për zhvillim të qëndrueshëm. Sfidat për tregun e punës janë edhe më të ndjeshme në Bullgari, sepse popullsia e vendit tonë është zvogëluar nën 6,5 milionë banorë.

Punësimi sezonal është një fenomen i përkohshëm në tregun e punës si për personat që kërkojnë punë në Bullgari, ashtu edhe për bashkatdhetarët tanë që duan të realizohen jashtë vendit. "Për sa i përket realizimit në Bullgari, Agjencia e Punësimit organizon panaire pune përpara fillimit të sezonit veror, ku njerëzit mund të takohen drejtpërdrejt me punëdhënës potencialë" – kujton Gabriela Goranova-Dimçeva, zëvendësdrejtoreshë ekzekutive e Agjencisë së Punësimit.

"Kjo ndodh zakonisht gjatë marsit dhe prillit, kur sezoni ende nuk ka filluar, që të mund të punësohet në kohë personeli për hotelet dhe restorantet në Detin e Zi. Sa i përket njerëzve që kërkojnë realizim jashtë vendit, në praktikë ne kemi vëzhgim për atë, sa njerëz të regjistruar në zyrat e punës e ndërpresin regjistrimin e tyre për shkak se fillojnë punë në një shtet tjetër të BE-së. Nëse shikojmë të dhënat për 6 muajt e parë, janë 5 mijë vetë për 5 muajt e parë të vitit 2025 që janë çregjistruar nga zyrat sepse kanë gjetur punësim sezonal jashtë vendit. Punëtorët tanë më së shpeshti shkojnë në shtete si Italia, Gjermania, Greqia, Franca, Belgjika. Sektorët ku ata punësohen janë bujqësia, por gjithashtu edhe industria përpunuese dhe ndërtimi. Shpesh ka kërkesë edhe në hoteleri dhe restorante."

Këtu është e rëndësishme të theksohet se zyrat e punës kanë funksionin të këshillojnë dhe të informojnë këta njerëz para se të largohen. Informacioni që u jepet është për kushtet e jetesës dhe të punës në shtetin ku duan të realizohen – theksoi Gabriela Dimçeva për Radio Bullgarinë dhe sqaroi se kjo kryhet përmes të ashtuquajturave shërbime për mobilitetin e punës EURES – në mënyrë që të jenë të vetëdijshëm për nivelet minimale të pagave, cilat janë institucionet përgjegjëse në situata të ndryshme në të cilat mund të gjenden në vendin ku po shkojnë, veçanërisht nëse është hera e tyre e parë. Një pjesë e madhe e informacionit është e qasshme në faqen kombëtare, e cila mirëmbahet nga KE. Aty ka informacion të detajuar për vendet e ofruara të punës, ndërsa vetë shërbimet për mobilitetin e punës ofrohen në të gjitha zyrat e punës në vend – 106 gjithsej.

"Nga fillimi i këtij viti papunësia në vendin tonë po bie. Sipas të dhënave zyrtare deri në fund të prillit, papunësia e regjistruar nga Agjencia e Punësimit është 5,25% – kjo është me 0,43% më pak se vitin e kaluar në të njëjtën periudhë" – thekson Gabriela Goranova-Dimçeva.

"Sigurisht, shërbimet tona ndërmjetësuese në lidhje me gjetjen e punës janë pjesë jashtëzakonisht e rëndësishme nga aktiviteti i Agjencisë dhe vetëm gjatë prillit mbi 19 700 vetë kanë gjetur punë pasi kanë qenë të regjistruar në zyrën e punës. Një aspekt tjetër i rëndësishëm është fakti që ne aktivisht përpiqemi të arrijmë te njerëzit që nuk janë të regjistruar përmes Agjencisë së Punësimit apo në zyrat e punës dhe njëkohësisht as nuk mësojnë, as nuk punojnë. Këta janë të ashtuquajturit njerëz joaktivë, dhe qëllimi ynë është t’i arrijmë, që të mund t’i motivojmë të regjistrohen në zyrat e punës dhe pastaj të marrin një shërbim të përshtatur me nevojat e tyre individuale. Në disa raste kjo ndodh përmes përfshirjes në trajnim, në raste të tjera – kjo mund të jetë një ofertë e drejtpërdrejtë për një vend pune. Në disa situata njerëzit kanë nevojë vetëm për motivim dhe për krijimin e aftësive për të përgatitur një CV dhe si të veprojnë kur shkojnë në një intervistë pune te ndonjë punëdhënës. Këto gjëra duken të qarta dhe të thjeshta, por kur bëhet fjalë për një të ri dhe të papërvojë, kjo me të vërtetë mund të jetë një pengesë për paraqitjen e tij të mirë."

Raporti i vendeve të lira të punës në krahasim me numrin e të papunëve të regjistruar për muajin maj tregon se për një vend pune presin 6 persona të regjistruar që kërkojnë punë. "Sigurisht, është me rëndësi të parë, nëse një person ka kualifikim të lartë apo jo – prej kësaj varen shanset e tij për t’u realizuar me sukses në tregun e punës" – thotë Gabriela Goranova-Dimçeva.

"Kjo është një nga sfidat kryesore te ne, sepse biznesi kërkon kuadro me kualifikim të lartë, por jo gjithmonë të regjistruarit në zyrat e punës si të papunë kanë kualifikimin e nevojshëm që të jenë të përshtatshëm për pozicionet e ofruara. Një nga mënyrat për ta kapërcyer këtë është përfshirja e të papunëve në lloje të ndryshme trajnimesh. Ato janë plotësisht falas për njerëzit, ndërsa aplikimi është shumë i lehtë dhe bëhet përmes faqes së internetit të Agjencisë. Ka shumë mundësi për ngritje të kualifikimit tani dhe rekomandimi i ekspertëve është që secili të njihet me to dhe nëse ka nevojë të kërkojë informacion në njësitë përkatëse të Agjencisë."