Për momentin, nuk ka kërcënim të menjëhershëm për Bullgarinë, në sfondin e konfliktit ushtarak në rritje midis Izraelit dhe Iranit. Qeveria jonë shpreh shqetësim për tensionin në rritje në rajon dhe rreziqet e mundshme për paqen dhe sigurinë ndërkombëtare. Një deklaratë nga qendra e shtypit e qeverisë thotë se ruajtja e rendit ligjor ndërkombëtar dhe mekanizmave të kontrollit të armëve janë me rëndësi të madhe. Në lidhje me sulmet e SHBA-së ndaj objekteve bërthamore iraniane më 22 qershor, institucionet bullgare bënë thirrje për ulje të tensionit dhe dialog. Në një deklaratë qëndrimi nga zyra e shtypit presidenciale, Kreu i Shtetit Rumen Radev thekson se përshkallëzimi i veprimeve ushtarake në Lindjen e Mesme është jashtëzakonisht shqetësues. "Ne presim që anëtarët e përhershëm të Këshillit të Sigurimit të OKB-së të gjejnë një rrugë drejt dialogut konstruktiv që do të parandalonte rrezikun e një katastrofe globale", tha Presidenti Radev. Një qëndrim të ngjashëm shprehu edhe Kryetarja e Asamblesë Kombëtare, Natalija Kisellova, e cila theksoi se përpjekjet e bashkësisë ndërkombëtare duhet t’u drejtohen negociatave dhe ndërprerjes së armiqësive.

Ministria e Punëve të Jashtme bëri thirrje gjithashtu për përpjekje diplomatike për të shmangur përkeqësimin e situatës në rajon. Duke iu referuar rekomandimeve të Agjencisë Ndërkombëtare të Energjisë Atomike dhe marrëveshjeve brenda kuadrit të regjimit për mospërhapjen e armëve të shkatërrimit në masë, Ministria jonë e Punëve të Jashtme thekson se Iranit nuk duhet t'i lejohet të zhvillojë një program bërthamor për qëllime ushtarake.

Informacioni është i BTA dhe Këshillit të Ministrave.

Redaktoi: Darina Grigorova

Përgatiti në shqip dhe publikoi: Vesella Mançeva

Foto:  Reuters Photo/iStock Photo