Agjencia Bullgare e Investimeve dhe Organizata e Tregtisë së Jashtme të Japonisë po nënshkruajnë një memorandum mirëkuptimi që do t'i japë një shtysë të re marrëdhënieve tregtare dhe ekonomike midis Bullgarisë dhe Japonisë. Të dyja vendet po kërkojnë mundësi për të thelluar bashkëpunimin ekonomik në sektorë të tillë si transporti hekurudhor, energjia dhe teknologjia e informacionit. Memorandumi do të hapë një forum dypalësh biznesi, i cili fillon sot, 25 qershor, në Sofje, si pjesë e vizitës zyrtare në Bullgari të Zëvendësministrit Parlamentar të Ekonomisë, Tregtisë dhe Industrisë Akijoshi Kato. Për takimet e biznesit të partnerëve, delegacioni vizitues përfshin përfaqësues të kompanive japoneze në sektorë kyç me interes të ndërsjellë. Ky është një mundësi e shkëlqyer për ndërmarrjet e vogla dhe të mesme bullgare për të vendosur kontakte të drejtpërdrejta për bashkëpunim të ardhshëm.

Dje, 24 qershor, në një takim në Presidencë, Kreu i Shtetit Rumen Radev siguroi delegacionin japonez se biznesi japonez mund të shpresojë tek mbështetja politike е Bullgarisë për investimet në vendin tonë. Ministria e Energjisë diskutoi projektet për ndërtimin e katër hidrocentraleve të reja me pompë dhe akumulim me kapital privat, si dhe zgjerimin e kapacitetit bërthamor dhe prodhimin e hidrogjenit të gjelbër, në kontekstin e politikës së qeverisë japoneze për investimin e fondeve në projekte energjetike në vendet e Evropës Lindore. Pritet që tre nga katër njësitë e hidrocentralit “Çaira” të rikthehen në funksion në fillim të vitit 2026, duke siguruar mbi 600 megavat energji.

Lexoni më tepër në arkivin tonë:

• Nga Osaka vjen një kërkesë për marrëdhënie më aktive ekonomike ndërmjet Bullgarisë dhe Japonisë

Redaktoi: Darina Grigorova

Përgatiti në shqip dhe publikoi: Vesella Mançeva

Foto: Ministria e Energjisë, Presidenca