Është jashtëzakonisht e rëndësishme që delegacioni bullgar (në Parlamentin Evropian) të votojë në mënyrë të bashkuar në favor të Bullgarisë. Këtë e deklaroi kryeministri Rosen Zheljazkov për gazetarët në Razllog, në lidhje me vendimin e pritur më 8 korrik nga PE për pranimin e vendit tonë në eurozonë. Pas votimit në Parlamentin Evropian do të pasojë votimi përfundimtar në Këshillin e BE-së në formatin ECOFIN, dhe më pas nënshkrimi formal i tri akteve juridike të nevojshme që Bullgaria të mund të prezantojë euron më 1 janar 2026, rikujtoi kryeministri.

Nga gushti fillon një fushatë e gjerë informuese, si dhe një punë e intensifikuar e institucioneve shtetërore për të parandaluar mashtrimet dhe spekulimet në lidhje me kalimin e Bullgarisë në euron.
Një muaj pas vendimit të Këshillit fillon shënimi i dyfishtë i çmimeve për të gjitha mallrat dhe shërbimet. Zheljazkov u bëri thirrje qytetarëve të mos nxitohen të shkëmbejnë levat në euro që tani. Ai kujtoi se nga 1 janari 2026, gjatë gjashtë muajve të parë të vitit, të gjitha bankat dhe degët postare do të kryejnë shkëmbimin falas, dhe më pas, deri në fund të vitit, bankat tregtare mund të vendosin një tarifë, por në Bankën Kombëtare Bullgare (BNB) procesi do të vazhdojë të jetë falas, njoftoi BTA.

Redaktoi: Miglena Ivanova

Përgatiti në shqip dhe publikoi: Svetllana Dimitrova

Foto: BTA