Dashnorët e tundimeve të ëmbla e lidhin qytetin e Ruses me magjinë e çokollatës dhe arrave të quajtur torta Garash. Më 13 shtator, në qytetin e Danubitdo të zhvillohet një festë e veçantë kushtuar ëmbëlsirës, dhe tashmë është e qartë se si do të duket logoja e këtij eventi.

Në konkursin për krijimin e një marke tregtare për Festivalin e Tortës Garash morën pjesë 42 pjesëmarrës të cilët treguan kreativitet dhe njohuri për historinë e ëmbëlsirës. Fituesi u bë projekti i Gergana Mollovës, e cila e tregon tortën përpara një imazhi të skicuar të ndërtesës emblematike të qytetit, e ashtuquajtuara “Ndërtesa e të Ardhurave”, dhe slogani është "Torta Garash – Shija e Ruses që nga viti 1885". Autorja e projektit të vlerësuar është nga Ruse, ajo merret me dizajn prej 15 vjetësh dhe punon me porosi për tregun ndërkombëtar.

Ideja për konkursin lindi pas një diskutimi publik kushtuar organizimit të edicionit të katërt të ardhshëm të ngjarjes më të shijshme në qytet. Sipas të pranishmëve, qëllimi i logos është ta shndërrojë Festivalin e Tortës Garash në një markë turistike edhe më të njohur, një simbol kulturor dhe gastronomik të qytetit të Ruses.

Detajet rreth historisë së tundimit të ëmbël, nga vjen emri i tij dhe cila është lidhja e tij me Princin bullgar Batenberg, mund të lexohen në botimin nga koleksioni i Radio Bullgarisë: Torta e njohur “Garash” është krijuar në Bullgari.  

Përpiloi: Joan Kolev

Përgatiti në shqip dhe publikoi: Vesella Mançeva

Foto: BTA