Ligji i ri i lejon të rriturve të sëmurë në mënyrë të pashërueshme të përfundojnë jetën e tyre me ndihmë mjekësore, në kushte të rrepta – shëndet i mirë mendor, sëmundje terminale dhe vuajtje të padurueshme pa shpresë për përmirësim. Legjislacioni u mbështet nga një referendum vitin e kaluar, ku 55% e votuesve e miratuan masën.

Vendimi përfaqëson një ndryshim të rëndësishëm në politikat për fundin e jetës në rajon dhe mund të ndikojë në debatet në vende të tjera të Evropës Lindore. Kundërshtarët e ligjit vazhdojnë të shprehin shqetësime për minimin e “shenjtërisë së jetës” dhe mundësinë për keqpërdorim të dispozitave të reja. Paralelisht me ligjin kryesor, parlamenti miratoi edhe ndryshime në legjislacionin për përdorimin mjekësor të kanabisit.

Kryeministri rumun Ilie Bolozhan u takua me përfaqësues të Këshillit të Investitorëve të Huaj, njofton BTA. Gjatë bisedimeve në Bukuresht, ai theksoi se qeveria do të vazhdojë me masat që synojnë uljen e shpenzimeve shtetërore, përmirësimin e mbledhjes së të ardhurave buxhetore dhe korrigjimin e çekuilibrave ekonomikë. Ai theksoi se tërheqja e investimeve të drejtpërdrejta të huaja është përparësi për Rumaninë në vitet në vijim. “Ne ju konsiderojmë ju, investitorët e huaj, si ambasadorë ekonomikë të Rumanisë dhe dua të dërgoj një mesazh të qartë: megjithëse po kalojmë një periudhë të vështirë, Rumania mbetet një vend ku mund të bëhen investime me përfitim të mirë”, tha Bolozhan. Të dyja palët nënvizuan rëndësinë e promovimit të një sërë masash fiskale dhe ekonomike që do të kontribuonin në rritjen e qëndrueshme.

Në maj, në sfondin e zgjedhjeve presidenciale të përsëritura në vend, dhomat e mëdha të biznesit në Rumani, përfshirë ato amerikane, britanike dhe gjermane, shprehën shqetësim për përkeqësimin e klimës investuese dhe të besimit në ekonominë rumune. Në dhjetor 2024, “Fitch” konfirmoi vlerësimin e kreditit të shtetit ballkanik në nivelin “BBB-”, por ndryshoi perspektivën e tij nga “e qëndrueshme” në “negative”. Rishikimi i ardhshëm i vlerësimit të Rumanisë është planifikuar për 15 gusht të këtij viti. Vlerësimi është jashtëzakonisht i rëndësishëm për tërheqjen e investitorëve të huaj.

Dhjetë persona humbën jetën dhe 14 të tjerë u shtruan në spital pas luftës me zjarret e rënda që po përfshijnë Turqinë, njoftoi ministri i Bujqësisë dhe Pyjeve të vendit, Ibrahim Yumaklı, i cituar nga BNT. Gjatë një zjarri në Eskishehir, që përfshiu territore të mëdha, 24 persona u gjendën të bllokuar në kurthin e flakëve, pasi era ndryshoi drejtim. Stuhia e zjarrit mori jetën e pesë vullnetarëve nga ekipet e shpëtimit dhe pesë punonjësve të shërbimit pyjor. Katërmbëdhjetë punonjës të tjerë të pyjeve janë shtruar në spital.

Aktualisht në Turqi, në sfondin e temperaturave të larta, po digjen shumë zjarre të mëdha.

Gjysma e grekëve nuk kanë para për të bërë pushime këtë verë. Ata kufizohen edhe në blerjen e produkteve ushqimore, raportoi për BNR korrespondentja nga Greqia, Katia Peeva. Një studim i publikuar këtë javë tregon se grekët i kanë reduktuar ndjeshëm shpenzimet e përditshme. Në qershor, krahasuar me muajt e mëparshëm, shpenzimet për restorante janë ulur me 50%, ndërsa për veshje – me 45%. Të dhënat tregojnë gjithashtu se grekët shpenzojnë 23% më pak për udhëtime. Për sa i përket produkteve ushqimore të nevojshme, vetëm për një muaj kufizimet janë në masën 4%, me blerje të artikujve të lirë dhe në sasi të vogla.

Sipas një studimi tjetër, gjysma e grekëve nuk do të pushojnë këtë verë për shkak të mungesës së mjeteve financiare. Ata që megjithatë mund të përballojnë pushime vjetore, i kanë ulur me 20% numrin e netëve të qëndrimit. Çmimet e larta të biletave të trageteve i largojnë si shumë grekë, ashtu edhe të huaj nga pushimet në ishuj.