Gjatë natës së 12 duke u gdhirë 13 gusht, qielli mbi Bullgari do të ofrojë një nga spektaklet natyrore më mbresëlënëse – kulmin e shiut të meteorëve Perseid. Pritet që dhjetëra “yje që bien” në orë të ndriçojnë errësirën – një moment ideal për adhuruesit e astroturizmit, sipas njoftimit të Ministrisë së Turizmit. Bullgaria është ndër destinacionet më tërheqëse në Evropë për këtë lloj përvoje. Ndër vendet më të mira për të vëzhguar këtë spektakël qiellor është Observatori Kombëtar Astronomik Rozhen, në malin e Rodopeve – kompleksi më i madh astronomik në Ballkan, në mbi 1700 metra lartësi mbidetare. Rajoni i Rodopeve Lindore, rreth qyteteve Maxharovo dhe Krumovgrad, ku qielli i natës është jashtëzakonisht i errët dhe Rruga e Qumështit dallohet si një re ndriçuese gjithashtu ofron kushte të mira për vëzhgim. Për ata që preferojnë të qëndrojnë më afër qytetërimit një alternativë e mirë është Pllaja e Shumenit. Malet Stranxha dhe Sakar janë rajonet më të përshtatshme larg turizmit masiv, ku qielli është ndër më të errëtit në vend. Bellogradçik dhe Shkëmbinjtë e famshëm të Bellogradçikut, që ofrojnë jo vetëm një qiell kristaltë të pastër, por edhe një peizazh unik, e bëjnë astrofotografinë edhe më emocionuese. Në jugperëndim, qyteti Mellnik dhe mali Pirin gëzojnë një klimë të thatë dhe net të kthjellëta. Në lindje, Shablla dhe Durankullaku, larg dritave të resorteve të mëdha bregdetare, janë gjithashtu vende të shkëlqyera për të vëzhguar qiellin e natës me horizont detar.

Redaktoi: Miglena Ivanova

Përgatiti në shqip dhe publikoi: Svetllana Dimitrova

Foto: bgtourism.bg