Lideri i partisë GERB, Bojko Borisov, u takua në Dyseldorf me drejtorin ekzekutiv të koncernit gjerman të industrisë së mbrojtjes “Rheinmetall”, Armin Papperger. Gjatë bisedimeve u bë e ditur se, brenda tre javëve të ardhshme, duhet të përgatiten kontratat për krijimin e një shoqërie të përbashkët mes një ndërmarrjeje bullgare dhe “Rheinmetall”, për ndërtimin e dy fabrikave në vendin tonë, raportoi BNR “Horizont”.

“Rheinmetall” do të ndërtojë së bashku me Bullgarinë, në një të ardhme shumë të afërt, të paktën dy fabrika në territorin bullgar. E para do të jetë për prodhimin e predhave artilerie. Edhe më e rëndësishme është ndërmarrja jonë e përbashkët për barut”, tha Armin Papperger, drejtori ekzekutiv i koncernit gjerman të armëve. Ai theksoi se investimi i përgjithshëm do të kapë vlerën e mbi 1 miliard eurove.

Lideri i GERB, Borisov, deklaroi se fabrika e barutit do të jetë më e madhja në Evropë. “Kjo është lënda më e kërkuar dhe më në mungesë për momentin, dhe jam jashtëzakonisht mirënjohës ndaj zotit Papperger dhe ekipit të tij, të cilët ishin në Bullgari dhe zgjodhën terrenin e Uzinave “Vazov” për këtë fabrikë gjigande,” theksoi Borisov.

Redaktoi: Miglena Ivanova

Përgatiti në shqip dhe publikoi: Svetllana Dimitrova

Foto: Qendra e Shtypit e GERB-it