“Sofja u ndryshua në një mënyrë të mirë, megjithëse jo perfekte. Para 10 vitesh një sërë stacionesh metroje nuk ishin ndërtuar, linja e tretë e tij nuk ekzistonte fare. Ura e Luanëve ishte një vend jashtëzakonisht i pakëndshëm, ku askush nuk donte të shkonte, ndërsa tani është formuar një shesh i mrekullueshëm. Rruga ‘Vitoshka’ nuk ishte këmbësore, në mes të saj kalonin tramvaje dhe makina nga mëngjesi deri në mbrëmje dhe aty kishte vazhdimisht trafik. Shumë ndërtesa të vjetra rifilluan jetën e tyre të re, megjithëse shumë njerëz pohojnë se nuk është krejtësisht kështu. Shtëpiza te stacioni ‘Vishneva’ u dogj dhe u ndërtua përsëri, u krijua Muzeu i Historisë së Sofjes, që gjithashtu ndodhet në një vend simbolik, u krijua ‘Leximorja’ dhe u shfaqën shumë festivale. Sofja po ndryshon, por e vërteta është se nuk duhet ta lëmë vetëm bashkinë apo shtetin të merren me problemet që kemi, nëse kemi mundësi edhe ne vetë duhet të japim diçka nga vetja për mjedisin përreth nesh.”

Në këtë botim të albumit fotografi ka vendosur si njerëz dhe peizazhe të zakonshme, ashtu edhe shumë ngjarje që ndodhën në qytet.

“Qoftë festivalet ‘Lumenjtë e Sofjes’, Sofia lights apo A to Jazz, por edhe ngjarje më fundamentale si kthimi i eshtrave të mbretit Ferdinand në tokën bullgare, vdekja e Shkëlqesisë së Tij Patriarkut Neofit, ka edhe fotografi nga disa protesta që ndodhën gjithashtu gjatë dekadës së kaluar.”

Fotografitë e fundit, që gjetën vend në album, janë bërë gjatë muajit korrik të këtij viti. Në faqe mund të gjejmë edhe fotografitë e para, që vunë fillimin e “Skicat e Sofjes”, të bëra më 16 dhe 17 mars 2015.

E pyetëm Ivanin edhe cilat janë fotografitë e zgjedhura prej tij për fillimin dhe fundin e librit:

“E para është bardhezi e një djali, i cili është ngjitur te Varri Vëllazëror në Kopshtin e Borisovës dhe tregon me gisht në një drejtim, ndërsa tre të tjerë poshtë, që janë vetëm silueta, ngrejnë duart dhe pyesin: ‘Çfarë na tregon?’ E fundit është një fotografi që doja të ishte fund për librin tim të parë, por nuk e përdora – djem me biçikleta, të cilët përsëri janë si silueta në sfondin e diellit që perëndon mbi bulevardin ‘Aleksandër Stambolijski’.”

Në intervistën e tij për Radio Bullgarinë Shishiev shpalli vendimin e tij që ky të jetë libri i fundit i kushtuar Sofjes për një periudhë mjaft të gjatë kohe:

“Nëse botoj një libër të ri për Sofjen, kjo do të ndodhë ose në 15 ose në 20-vjetorin e projektit. Para se njerëzit të mendojnë se po ndodh diçka e keqe, nxitoj t’i qetësoj se pas dy vitesh do të dalë albumi ‘Skicat e Bullgarisë’. Botimi do të përfshijë fotografi nga të gjitha rajonet në Bullgari, ku do të takohem me njerëz, me vende të rëndësishme dhe me gjërat e vogla, të cilat zakonisht shpesh i anashkalojmë.”