Ngjarjet me adresë ballkanike

botuar më 25-10-17 8.00.MD

Do të hiqen tarifat e roamingut me BE-në për Shqipërinë dhe Malin e Zi

Në vitin 2026 tarifat e roamingut midis Shqipërisë dhe BE-së do të hiqen plotësisht, tha gjatë vizitës së saj në Tiranë më 13 tetor kryetarja e Komisionit Evropian Ursula fon der Lajen. “Arritëm një marrëveshje me operatorët në vitin 2023 dhe vitin e ardhshëm do të heqim të gjitha tarifat e roamingut midis Shqipërisë dhe BE-së”, deklaroi fon der Lajen në një konferencë për shtyp me kryeministrin shqiptar Edi Rama. “Qëllimi juaj (i shqiptarëve) është të përfundoni negociatat deri në vitin 2027. Është ambicioze, por ne e pëlqejmë ambicien. Jemi gati dhe do të jemi me ju në çdo hap të rrugës”, tha më tej fon der Lajen, transmeton BTA.

“Qëllimi i Malit të Zi për t’u anëtarësuar në BE është me të vërtetë në një distancë të vogël”, deklaroi në Podgoricë më 14 tetor fon der Lajen gjatë turneut të saj në Ballkanin Perëndimor dhe shtoi se roamingu midis Malit të Zi dhe BE-së gjithashtu do të hiqet në vitin 2026.

Më shumë kroatë jetojnë jashtë vendit sesa në atdheun e tyre historik

Për herë të parë në histori më shumë kroatë jetojnë jashtë vendit sesa në atdhe. Këtë e tha në Osijek zëvendëskryeministri Ivan Anushiç në konferencën “Emigracioni kroat dhe zhvillimi ekonomik”, shkruan jutarnji.hr. Ai theksoi se në Kroaci jetojnë rreth 3,8 milionë kroatë, ndërsa sipas vlerësimeve rreth 5 milionë janë jashtë vendit.

Ministri i demografisë dhe emigracionit Ivan Shipiç deklaroi për Radion dhe Televizionin Kroat (hrt.hr) se për herë të parë pas shumë vitesh ka një tendencë të kthimit të shtuar të emigrantëve dhe pasardhësve të tyre. Statistikat tregojnë se më shumë njerëz po kthehen sesa po largohen. Shipiç pranoi se pengesa administrative dhe procedurale ende pengojnë një pjesë të atyre që dëshirojnë të kthehen, por ato do të hiqen. Ai prezantoi një program të ri me buxhet prej 30 milionë eurosh për nxitjen e vendosjes në rajonet e braktisura të Zagorës Dalmate, Likës dhe Sllavonisë.

Në Greqi dita e punës tashmë mund të zgjasë deri në 13 orë

Parlamenti i Greqisë miratoi një reformë që lejon një ditë pune të përkohshme 13-orëshe në rrethana të caktuara. Projektligji, i propozuar nga qeveria konservatore, shkaktoi kritika të ashpra nga sindikatat dhe opozita. Në tetor sindikatat organizuan dy greva kombëtare, ku mijëra punëtorë protestuan kundër projektligjit. Sipas partisë së majtë “Syriza”, ligji është “i denjë për Mesjetën”. Por qeveria ngul këmbë se dita 13-orëshe e punës do të jetë plotësisht vullnetare, do të zbatohet vetëm në sektorin privat dhe jo më shumë se 37 ditë në vit, transmeton BGNES. Rregullat e reja i lejojnë punëdhënësit më shumë fleksibilitet në punësimin afatshkurtër të personelit.

Sipas të dhënave të Eurostat, Greqia është vendi me pjesën më të madhe të të punësuarve që punojnë mbi 45 orë në javë.

Do të mbahen zgjedhje për presidentin e komunitetit të Qipros Veriore

Në Qipron Veriore të pushtuar nga Turqia do të zgjidhet presidenti i shtetit të njohur vetëm nga Ankaraja. Zgjedhjet po ndiqen me interes të madh, sepse rezultati do të tregojë nëse është e mundur që bisedimet për zgjidhjen e çështjes gjysmëshekullore qipriote të ringjallen pas 8 vitesh ngecjeje, transmeton agjencia ANA-MPA.

Më 19 tetor përplasja kryesore do të jetë midis presidentit aktual Ersin Tatar dhe liderit të Partisë Republikane Turke socialdemokrate Tufan Erhjurman. Tatar këmbëngul për krijimin e 2 shteteve dhe hedh poshtë çdo model federativ, ndërsa në platformën e Erhjurman ka më shumë nuanca. Ai zhvillon tezën për “dy popuj të barabartë”, të cilët janë “partnerë themelues të ishullit”.

Sipas një ankete të agjencisë Public Global, Tatar kryeson me 51,2 për qind kundrejt 47,9 për qind për Erhjurman.

Në Stamboll u hap një ekspozitë për huazimet osmane në gjuhët e huaja

Fjalë turke të njohura, të përdorura në gjuhë të tjera, përfshirë edhe në bullgarishten, tërheqin vëmendjen në një ekspozitë të organizuar në bibliotekën “Rami”. Qendra letrare është kompleksi më i madh bibliotekar në Stamboll. Ekspozita mban titullin “Verinti”, që përkthehet si “fjalë e dhënë nga një gjuhë në tjetrën”. Në ekspozitë janë përfshirë fjalë turke të përdorura në rreth 20 gjuhë, transmeton Agjencia Informative Anadoll (Anadolu Ajansı).

Çdo gjuhë është paraqitur në ekspozitë me një kuti transparente të veçantë – kasafortë, në faqen ballore të së cilës janë shkruar fjalë turke të njohura që përdoren në gjuhën përkatëse. Është e habitshme që shumë nga fjalët e huazuara turke në gjuhët e popujve të Ballkanit janë kryesisht terma kulinarë. “Mussaka” dhe “bakllava” janë vetëm disa nga fjalët që përdoren edhe sot në gjuhët ballkanike si rumanishtja, bullgarishtja dhe greqishtja. E përdorur në të folurat e huaja është edhe fjala “merak”.

Përpiloi: Ivo Ivanov

Përgatiti në shqip dhe publikoi: Sindi Nikollofski

Foto: Reuters, Facebook /Ivan Anušić, BGNES, Freepik, ramikutuphanesi.gov.tr

Ndaje

Ngjarjet me adresë ballkanike

Ndaje

Më shumë nga rubrika

Ngjarjet me adresë ballkanike

Bullgaria shpreh solidaritet me Lituaninë pasi Rusia shkeli përsëri hapësirën ajrore evropiane

Presidenti Rumen Radev: Industria bullgare e mbrojtjes ofron mundësi për partneritete të suksesshme

Presidenti Rumen Radev: Industria bullgare e mbrojtjes ofron mundësi për partneritete të suksesshme

Bullgaria shpreh solidaritet me Lituaninë pasi Rusia shkeli përsëri hapësirën ajrore evropiane

Sekretari i Përgjithshëm i Partisë Komuniste të Vietnamit, To Lam, ndodhet për një vizitë zyrtare në Bullgari