Rreth 90% e antikave të sekuestruara gjatë një operacioni ndërkombëtar kundër një rrjeti për trafik të vlerave kulturore do t’i kthehen Bullgarisë. Këtë e deklaroi për “Nova televizija” zëvendësministri i kulturës Todor Çobanov. “Bëhet fjalë për një aksion të paparë për nga përmasat. Në gjysmëshekullin e fundit nuk ka pasur një operacion kaq të madh kundër një rrjeti ndërkombëtar të trafikut të antikiteteve”, tha Çobanov. Ai shpjegoi se objektet u siguruan përmes gërmimeve të paligjshme dhe përfshijnë periudhën nga shekulli i VII-të p.e.s. deri në shekullin e III–IV të e.s., duke qenë kryesisht prej metaleve të çmuara – ar dhe argjend.

Vlera e përgjithshme e antikave të sekuestruara përllogaritet në rreth 100 milionë euro. Çobanov theksoi se këto rrjete veprojnë globalisht dhe merren jo vetëm me trafik të antikave, por edhe me narkotikë, pastrim parash dhe trafik njerëzish.

• Bullgaria koordinoi një aksion të gjerë ndërkombëtar kundër trafikut të antikave

Redaktoi: Ivo Ivanov

Përgatiti në shqip dhe publikoi: Svetllana Dimitrova

Foto: Ani Petrova