Kryeministri i ri i Bullgarisë, Kirill Petkov, ka sinjalizuar se Sofja do të ndalojë së penguari Maqedoninë Veriore në rrugëtimin e saj drejt Bashkimit Evropian. Në një intervistë për Financial Times, Petkov konfirmoi angazhimin e Bullgarisë ndaj NATO-s dhe Perëndimit. "Ne jemi 100% në anën e duhur të politikave të NATO-s dhe BE-së," i tha ai gazetës. “Do të propozojmë një proces të ri për Maqedoninë e Veriut, i cili do të jetë shumë i shpejtë, me një afat kohor të kufizuar prej vetëm 6 muajsh”, tha Petkov.
Kryeministri i Maqedonisë së Veriut, Zoran Zaev, uroi Kirill Petkovin në një bisedë telefonike për zgjedhjen e tij kryeministër. Të dy ranë dakord të vazhdojnë punën për të gjetur një zgjidhje të pranueshme dhe për të zhbllokuar fillimin e bisedimeve të anëtarësimit të Shkupit në BE, njoftoi BGNES.
